د پاکستان د پوځ د عامه اړيکو څانګه ای ايس پي آر وايي، د پوځ د مشر په دوره کې ګوادر، آواران او د تربت شامل دي.
د پوځ مشر جنرل قمر جاويد باجوه تېره شپه په تربت کې تېره کړه او د ګل- دوشنبې په ورځ یې د بلېدې د لويې لارې پرانیسته وکړه. پر دې مهال د بلوچستان وزيراعلی مير عبدالقدوس بزنجو او نور پوځي افسران هم له ده سره ملګري وو.
جنرل قمر جاويد باجوه وويل چې په بلوچستان کې د امن د راتګ او د پرمختيا کارونه به د صو بایي حکومت په سلا باندې تر سره کېږي. جنرل باجوه په مکران کې د بلوڅو په یوه کلتوري مېله کې هم وينا وکړه او ویې ویل:
"د بلوچستان شاته پاته سيمو ته بنسټيزې اسانتياوې ورکول او ارامي راوستل د دغو سيمو د پرمختيا خوب په حقيقت بدلول دي".
جنرل باجوه تر دې وړاندې تېره ورځ ګوادر ته لاړ او هلته یې د څښلو د پاکو اوبو د پلانټ پرانیسته وکړه، چې د سويزرلېنډ او عرب اماراتو په مالي مرسته به په اتو مياشتو کې بشپړ شي.
د پاکستان د پوځ مطبوعاتي دفتر وایي، دغه پلانټ به په پیل کې د ورځې تر څلور زره زيات ګيلن اوبو ورکولو وړتیا ولري، چې وایي وروسته دغه کچه تر اته زره ګیلنه هم رسېدلای شي.
د پاکستان او چين د اقتصادي لارې د پروژې مرکز ګوادر دا وخت د څښلو د پاکو اوبو له سخت کمښت سره مخامخ دی او خلک یې وخت په وخت د اوبو د نشتوالي لپاره احتجاجونه هم کوي.
د پوځ مشر د پرانیستنې په غونډه کې د سیمې له خلګو سره هم وليدل او وروسته یې د خوشحال بلوچستان د پروګرام څارنه هم وکړه. ده په خپلو خبرو کې وویل:
"د پرمختيایي پروژو تر بشپړتیا وروسته به د خلکو په ژوند کې بد لون راشي او ګوادر به په سیمه کې د تجارت او سوداګرۍ مرکز وګرځي".
بلوچستان ته د پوځ د مشر د ورتګ په مهال کلک امنیتي ګامونه اخیستل شوي وو، خو پر دې برسېره تېره ورځ تربت ته د ورتګ په مهال د ښار پر شاپور هوټل ناڅرګندو وسلوالو لاسي بم ور وغورځاوه، چې د يو عسکر په شمول یې څلور تنه ژوبل کړل. ذمه یې وسلوال سازمان بلوچستان لیبرېشن فرنټ واخیسته.