ملګرو ملتونو اندېښنه ښودلې چې په افغانستان کې د سختې وچکالۍ له امله شاوخوا دوه میلیونه خلک د خوراکي موادو د کمښت سره مخ کیدلی شي.
ملګري ملتونه وایي د افغانستان په دریوؤ کې دوه برخې زمکه د وچکالۍ سره مخ ده اؤ ښایي دا وچکالي به افغانان د یو لړ ستونزو سره مخ کړي.
دملګرو ملتونو اړونده ادارې پخپل یو بیان کې ویلي چې د افغانستان ۷۰فیصدي برخه د بارانونو څخه محرومه پاتې شوې یا پکې ډیر کم باران شوی چې له دې امله د ژمي دپاره کرل کیدونکي فصلونه هم اغیزمن شوي دي.
ملګري ملتونه دا هم وایي چې پسرلي موسم کې د وچکالۍ سیوا کیدو له امله د افغانستان بیلابیلو سیمو نه په زرګونو خلک بې کوره شوي دي.
د رویټرز خبري رسنۍ د راپور له مخې لږ تر لږه د افغانستان په ۲۰ ولایتونو کې له همدا اوسه خلک له وچکالۍ (سوکړې) څخه سر ټکوي.
په دغو ۲۰ ولایتونو کې د تېر ژمي په موسم کې واورې او بارانونه ۶۰ سلنه (فیصدي) کم شویدي.
په افغانستان کې د طبعي پېښو سره د مبارزې د ملي ادارې ویاند هشمت خان بهادري ویلي
“سږ کال وچکالي دې کچې ته رسېدلې چې مونږ باید د هېواد په ګڼو سیمو کې بیړنی حالت اعلان کړو”
بهادري وړاندې وویل، ددغې ستونزې د حل لپاره به بودیجه ځانګړې شي خو باید له دغه هېواد سره د خوراکي توکو د واردولو لپاره د پیسو مرسته وشي.
په افغانستان کې د امریکا د مرستو پراختیايي ادارې (یو اس آی ډي) ویلي چې د ۲۰۰۲ کال راهیسې سږ کال د لوموړي ځل لپاره واوره دومره کمه ورېدلې.
په افغانستان کې د زیاتې واورې ورېدل یو مهمه مسله ده ځکه په اوړي کې بیا د همدغو واورو د ویلې کېدو له امله اوبه جوړیږي او ځمکې پرې خړوبیږي.
د ماشومانو لپاره د ملګروملتونو ادارې (یونسیف) د اپریل په میاشت کې له نړیوالو څخه د لسو میلیونو ډالرو غوښتنه کړې وه چې پرې وچکالي ځپلو ولایتونو کې ماشومانو او د هغوي له کورنیو سره مرسته وکړي.
یونسیف دا هم ویلي وؤ چې په لسو زیاتو متاثرو ولایتونو کې د اوبو سرچینې له ۲۰ تر ۳۰ فیصدو پورې کمې شویدي.
