د شمالي کیليفورنیا په یوه ځنګله کې د اور لګېدو له کبله شاوخوا۵۰۰ ودانۍ سوځېدلي او په بشپړه توګه ویجاړې شوې دي. چارواکي وايي چې ۵۰۰۰ نورو ودانیو ته هم د اور رسېدلو خطر دی.
د ایالت ګورنر جیري برون په سیمه کې بیړنی حالت اعلان کړی او له مرکزي حکومته یې د مرستو غوښتنه کړې چې د اور د لا نور شدت اخیستو مخه ونیسي او لګېدلی اور ژر تر ژره مړ کړي.
رپوټونه وایي تر اوسه دوو اور وژونکو هم د اور مړ کولو پر مهال خپل ژوند له لاسه ورکړی.
له شاوخوا سیمو څخه په لسګونه زره خلک د خپل ژوند ژغورلو لپاره له سیمې وتلي دي.
د اور وژنې ادارې ویلي تر اوسه دې اور شاوخوا ۱۷۰۰۰ هکټاره ځمکه سوځولې ده.
هغه سیلانیان چې د دې طبعي پارک یا ځنګل د لیدو لپاره تللي وو بیرته خپل پلانونه بدلوي. نوموړی پارک د جولای له ۲۵ نېټې راهسې تړل شوی دی او تمه نه کیږي چې د اګست تر ۰۳ بیرته پرانیستل شي.
د پارک د تنظیم چارواکي وايي تر اوسه د کېمپ یا سیاحتي خېمې او د هوټل لږ تر لږه تر ۱۰۰۰ زیات بوکننګونه د خلکو له خوا ځنډیدلي او منسوخ شوي دي.
په شمالي کیليفورنیا کې د اورلګېدنې بادونه په ځینو سیمو کې خورا تېز شوي او لا نورو ونو ترې اور اخیستی.
د کیلیفورنیا د ځنګلونو او اور وژنې د څانګې ویاند چیډ کارل رسنیو ته وویل، ډېری ونې پر کورونو ور غورځیدلې دي.
په سویلي کیلیفورنیا کې د اور وژنې څانګې له ایډلي وایلډ ښار ګوټي څخه ۱۲۰۰۰ استوګن له خپلو کورونو او دې سیمې څخه په وتلو مجبوره کړي. چارواکو د لګېدلي اور په تور یو مشکوک تن هم نیولی دی.
د امریکې نورې مربوطه حکومتي ادارې دا مهال د کیلیفورنیا د اور وژنې له مرکز سره د همکارۍ لپاره همغږې دي او مرستې یې هم پیل کړي.
په ۲۰۱۸م کال کې د کیليفورنیا په ځنګلونو کې لګېدلی اور په دې لسیزه کې تر ټولو ناوړه دی چې تر اوسه يې شاوخوا ۱۱۷،۲۴۸ هکټاره ځمکه سوځولې ده.