د کوټې په سنجيدي کې د سکرو په نړيدلي کان کې تراوسه پورې اووه خواري کښ بند پاتې دي، او د راويستو دپاره يې کار دوام لري.
د بلوچستان صوبې مرکز کوټې ښار نه نزدې په ۴۰ کلوميټره فاصله باندې د اتوار، يکشنبې په ورځ د سکرو کان د زهرجن ګېس د چاؤدنې نه نړېدلی او ۱۵ خواري کښ پکې ګېر شوي وو.
د خواري کښو اتحاديې ويلي پرون دوه نور هغه خواري کښ هم په کان کې ګېر شو چې د بندو خواري کښو راويستو هڅه يې کوله.
د بلوچستان صوبې د ماينونو د چارو مشر (چيف انسپکټر) افتخار احمد پخلی کړی چې د سنجيدي د کان څخه د پرونه پورې د لسو خواري کښو مړي راويستل شوي او اووه لا په کان کې بند پاتې دي.
خبريالانو سره په خبرو کې هغه ويلي د نور بندو خواري کښو د راويستو دپاره کار روان دی او زیاته يې کړه په کان کې دننه اوس هم ګېس موجود دی اول د ګېس ويستلو هڅه کولی شي او بيا به کان ته دننه لار جوړولی شي.
هغه وويل دوی وخت نه ټاکي چې د کان څخه به کله ګېس وويستی شي خو وې ويل په دغه عمل کې د دوه ساعتو نه تر دوه ورځو پورې وخت لګېدی شي.
وي او ای ډیوه سره د پېښې په دوېمه ورځ خبرو کې نوموړي ويلي ؤ دغه کان ۴۵۰۰ فټه ژور دی ځکه د لاندې ګېر خواري کښو په راويستو کې به وخت ولګي.
د نوموړي په وېنا په راويستل شوؤ مړو کې د زياتو تعلق د خېبرپښتونخوا د سوات او دير ضلعو سره دی، او پاتې خواري کښ هم د دغو سيمو دي.
د بلوچستان صوبې په هرنایي، شاهرګه، دوکۍ، مچ، ډګاري، ډاډر، څماولنګ، کولو او قلات سیمو کې د کولې ۲۵۰۰ کانونه له حکومت سره رجسټر دي، خو د ځینو غیرسرکاري شمېرو په بنیاد تر ۵۰۰۰ زیات کانونه غېرقانوني کانونه موجود دي.
په دغو کانونو کې شاوخوا یو لک دېرش زره مزدوران په کار بوخت دي چې زیاتره د خېبرپښتونخوا د شانګلې، سوات، دیر او د افغانستان اوسېدونکي دي. د سکرو په کانونو کې کارکوونکي زیات مزدوران له حکومت سره رجسټر هم نه وي.
په کانونو کې کارکوونکي مزدوران وایي، په کانونو کې دننه د دوی د سر د خوندي ساتنې لپاره اسانتیاوې په نشت حساب دي، ځکه خو هر کال په لسګونو کان کیندونکې پکې مړه کېږي.
په بلوچستان کې د سکرو کانونه تر ټولو لوی معدني صنعت ګڼل کېږي، خو د کارګرو د اتحادیې مشران وایي، له دې صنعته یواځې حکومت او شتمن خلک ګټه تر لاسه کوي، د مزدور نه یواځې ژوند ورسره نه دی بدل شوی بلکې اکثرو پکې ژوند هم بایللی دی.
