راپورنه وايي چې د لاقانونه ګرځول شوؤ ډلو سره د اړيکو په تور بندي ډاکټر شکيل افريدی د امنيتي اندېښنو له کبله د پنډۍ د اډياله زندان نه د پنجاب ساهيوال جېل ته منتقل کړې شوی دی.
دا دويم ځل دی چې شکيل افريدی د امنيتي انديښنو له امله کوم بل جيل ته انتقال کړی شوي دی.
شکيل افريدی اډياله جيل ته د روان کال د اپرېل په مياشت کې د منتقل کولو مخکې د پېښور په مرکزي زندان کې بند وو.
د پاکستان ډان ورځپاڼې د سرچينو له قوله ويلي چې د اګست په درېمه نېټه د شکيل افريدي سره د هغه ښځې او زوي د پنډۍ په اډياله جېل کې ليده کاته کړي وو.
د پنجاب ايالتي حکومت د نوموړي د ساهېوال جيل ته د منتقل کولو د خبر تصديق لا تر دې دمه نه دی کړی.
نوموړی په کال ٢٠١١ کې د القايده شبکې د مشر اسامه بن لادن د امريکايي کمانډوز سرتېرو لخوا په اېبټ اباښارګوټي کې د وژل کېدو سمدستي وروسته نيول شوی وو.
په هغه باندې د امريکې د استخباراتي ادارې (سي ايي ای) سره د اسامه بن لادن د درک لګولو تور وو خو نوموړي ته په دغه تور کومه سزا نه ده اورول شوې.
شکيل افريدي ته په کال ٢٠١٢ کې د غدارۍ په مقدمه کې د اېف سي ار قانون لاندې د ۳۳ کاله سزا ورکړی شوې وه چې وروسته د اېف سي ار کمشنر لس کاله بند ته راکمه کړه.