د افغانستان د ننګرهار ولايت ګورنر حیات الله حيات ويلي په جلال اباد کې يې د پاکستان د قونصلګرۍ په چارو کې لاس وهنه نه ده کړې.
پاکستان د جمعې په ورځ په جلال اباد کې خپله قونصلګري تړلې او تور یې لګولی چې د ننګرهار ولايت ګورنر د قونصلګرۍ په چارو کې لاس وهنه کوي، خو حيات دغه تورونه رد کړي دي.
د افغان رسنيو ترمخه حیات ويلي دوی حق لري چې د افغانستان او نړيوالو قوانينو لاندې په قونصلګرۍ کې دننه او بهر د خپلو وګړو د ساتنې او غبن د مخنيوي دپاره ګامونه واخلي.
د افغانستان د بهرنيو چارو وزارت ويلي په کابل کې د پاکستان د سفارتخانې په رابطه کې دي، تر څو په جلال اباد کې د پاکستان د قونصلګرۍ په سر جوړه شخړه هواره کړي.
کابل کې د پاکستان سفارتخانې ويلي قونصلګري به تر هغې تړلې وي څو پورې چې د قونصلګرۍ د امنیت پوره ګامونه نه وي پورته کړی شوي او سفارتخانه په اعتماد کې نه وي اخيستل شوي.
راپورونه وايي د خالي، شنبې په ورځ په کابل کې افغان او پاکستاني چارواکو د قونصلګرۍ په تړاؤ خبرې کړي دي.
افغان چارواکو ويلي په نزديو کې به قونصلګري خلاصه کړی شي.
خو د پاکستان د حکومت لخوا په دغه اړوند کوم رسمي غبرګون مخې ته نه دی راغلی.
راپورونه د پاکستاني چارواکو له قوله وايي د جلال اباد په قونصلګرۍ کې په يوه ورځ کې درې زره افغانانو ته ويزې ورکول کيږي.