د پېښور هايکورټ د مشال خان د پلار او خېبرپښتونخوا د صوبايي حکومت هغه خواست خارج کړی کوم چې د اېبټ اباد عدالت نه په ضمانت د ۲۵ سزاوارو کسانو د خوشي کېدو پرضد شوی ؤ.
د مردان په عبدالولي خان پوهنتون کې د مذهب د سپکاوي په تور وژل شوي مشال خان په قضيه کې د اېبټ اباد عدالت ۲۵ سزاوار شوي کسان په ضمانت خوشي کړي وو.
د مشال خان پلار اقبال لالا او د خېبرپښتونخوا حکومت د يادې پرېکړې پرضد پېښور هايکورټ ته خواست کړی ؤ.
د پېښور هايکورټ د مشر قاضي جسټس وقار احمد سېټهـ په مشرۍ د دوه قاضيانو ډلې پرون دغه خواست خارج کړی او د اېبټ اباد د عدالت پرېکړه يې په ځای ساتلې ده.
د مشال د کورنۍ وکيل فضل خان اېډوکېټ وايي، د فوجدارۍ په قضيه کې هايکورټ د درېو يا څلورو کالو په سزا کې ضمانت ورکولی شي خو د ترهګرۍ د مادو په مقدمه کې داسې نه شي کولی خو د پېښور هايکورټ د اېبټ اباد د خپلې څانګې فېصله په ځای وساتله.
هغه وويل په عدالتي نظام کې نيمګړتياوي شته او عدالت هم په تکنيکي بنيادونو دا فېصله په ځای ساتلې ده.
فضل خان وويل د يادې پرېکړې پرضد سپريم کورټ ته تلی شي خو په دغه اړوند يې لا صلاح نه ده کړې.
د مشال خان پلار اقبال خان وايي، د اېبټ اباد عدالت لخوا سزاوار شوؤ کسانو په ضمانت د خوشي کېدو په وخت دوي نه وو خبر کړی شوي، او اوس د پېښور هايکورټ يې هم خواست خارج کړو.
وي او ای ډيوه سره په خبرو کې هغه وويل د انصاف ترلاسه کولو دپاره يې دا خواست په دې فکر ورکړی ؤ چې د وطن نور بچي د داسې ډول بريدونو ښکار نه شي.
هغه زیاته کړه د انصاف لمن نه پرېږدي او تر سپريم کورټه به ځي ځکه چې د مشال قتل ورته ډېر زيان اړولی دی.
د روان کال فرورۍ د مياشتې په اوومه نېټه د خېبرپښتونخوا په هري پور زندان کې د ترهګرۍ د مخنیوي عدالت قاضي فضل سبحان د مشال خان د وژنې د مقدمې فېصله اورولې وه.
په فېصله کې يو تن ته د مرګ ، پينځوؤ ته د عمري بند او ۲۵ نورو ته د څلورو څلورو کالو د بند سزاګانې اورول شوې او ۲۶ کسان خوشي کړی شوي وو.
خو وروسته د فرورۍ د میاشتې په ۲۷م نېټه د پېښور هايکورټ د اېبټ اباد څانګې د مشال خان د وژنې په مقدمه کې د هاغو ۲۵ مجرمانو سزا معطل کړې وه چاته چې څلور کاله بند اورول شوی او د هغو د خوشي کېدو ضمانتونه يې منظور کړي وو.
د مشال خان پلار او صوبايي حکومت بيا نه يواځې د دغه پرېکړې بلکې د خوشي شوؤ کسانو او ورسره د نورو اورول شوؤ سزاګانو پرضد پېښور هايکورټ ته تللي وو.
فضل خان اېډوکېټ وايي د دوي يو خواست خارج شو خو نور خواستونه يې لا په عدالت کې دي.
