لاس رسیدونکی لینک

Breaking News

د ټرمپ په وړاندې راتلونکی چېلنج د ډیموکراټانو ځواکمنېدل دي


ټرمپ ریپبلکن سېنېټر سېنډې سمېت ته د ګل یا دوشنبې په ورځ د کمپاین پرمهال

واشنګټن: ولسمشر ډانلډ ټرمپ په مسېسېپې ایالت کې د رپبلېکن یا جمهوري غوښتونکي سناتور لپاره کمپاین کوي او په ورته وخت کې هڅه کوي په ۲۰۲۰ کې د خپل ځان د بیا ټاکل کېدو پر مسلې هم رڼا واچوي.

"د رپبلېکن تر واک لاندې امریکا پرمخ روانه ده، د امریکا اقتصاد وده کوي او امریکا پیاوړې کیږي داسې چې په تېرو وختونو کې یې ساری نه لیدل کېږي. زمونږ یو ځل بیا قدر کېږي او د یو هېواد په توګه راته د عزت په سترګه کتل کېږي. "

خو ټرمپ به هغه مهال له یو نوي حقیقت سره مخ شي کله چې ډیموکراټان په جنورۍ کې د امریکا د ولسي جرګې یا هاوز اف ریپرېزینټېټیو واک ترلاسه کړي.

په سېنېټ یا سنا کې ډیموکراټ وکیل چک شومر وايي:

"د امریکا خلکو د بدلون لپاره رایه ورکړې. دوی به اوس ولسمشر ټرمپ پرې نږدي چې له خلکو څخه د هغوی روغتیايي سیستم واخلي. له دوو اوږدو کلونو وروسته به مونږ دا ترلاسه کړو. "

له بای پارټېزن پالیسې سنټر څخه څېړونکی جان فورټیر وايي، ټرمپ باید اوس په واشنګټن کې د قدرت له یو نوي انډول سره چلند وکړي.

یو بل څېړونکی جېم کېسلر وايي، ځینې ډیموکراټان ښايي هڅه وکړي له ولسمشر سره د ګډ کار کولو لاره ومومي لکه د پراختیايي کارونو په برخه کې خو د ټرمپ د جنجالي سیاسي بڼه به یې په وړاندې یوه لویه ستونزه وي.

د ټرمپ په وړاندې یوه لویه معما دا هم ده چې دده د ټاکنیز کمپاین او د روسیې ترمنځ د اړیکو په سر د ځانګړي څارنوال رابړټ میولر له پلټنو به څه راووځي.

که څه هم ټرمپ په دغو پلټنو نیوکې کړي او ویلي یې دي چې دا دده د ښکار کولو لپاره پیل شوي.

خو ټرمپ کولای شي په مسېسېپي کې د سې شنبې یا نهې د ورځې په ټاکنو کې د ریبلکن سېنډې هېد سمېت په ګټلو سره یو څه د ارام ساه واخلي ځکه له دې سره به د راتلونکو دوو کلونو لپاره په سېنېت کې د جمهوري غوښتونکو یا ریپلېکن اکثریت وساتل شي.

بل پلو د شلو پرمختللیو هېوادونو مشران به د راتلونکې جمعې او شنبې په ورځ په ارجنټاین کې خپله ۱۹ سرمشریزه وکړي.

ارجنټاین ته تر روانېدو مخکې د ملګروملتونو عمومي منشي انټونیو ګوټېرېس خبرداری ورکړی چې نړۍ د باور او اعتماد له بحران سره مخ ده.

د امریکا ولسمشر ډانلډ ټرمپ هم په دې کار کوي چې د پرمخ تللیو هېوادونو له دې ډلې سره بیا یوځای شي.

څېړونکي وايي، له یادې سرمشریزې څخه به لویه هیله دا وي چې د چین او امریکا ترمنځ د ټکسونو د کمولو په برخه کې یو تړون وشي چې په ترڅ کې به یې سوداګریزې اړیکې وده وکړي.

XS
SM
MD
LG