د پاکستان د بهرنيو چارو وزارت ادعا کړې چې د افغانستان په پکتيکا کې اته قبايلي پاکستانيان وژل شوي، خو د پکتيکا د برمل ولسوالۍ پوليس مشر ويلي د درې عربو په ګډون يې ۱۵ طالبان وژلي دي.
د پاکستان د بهرنيو چارو د وزارت وياند محمد فېصل په يو ټويټ کې ويلي،
"پاکستان په پکتيکا کې د اته ؤ قبايلي بې ګناه پاکستانيانو د وژنې غندنه کوي"، نوموړي په ټويټ کې ادعا کړې دا اته وګړي "افغان ځواکونو وژلي دي".
خو نوموړي په دغه اړوند نور جزيات نه دي شريک کړي چې د وژل شوؤ قبايلو تعلق د کومې سيمې سره دی او کله وژل شوي دي؟.
د اتوار په ورځ افغان رسنيو ويلي ؤ د افغانستان په جنوب ختيځ کې د ډېورنډ پولې ته څېرمه د افغان ځواکونو په عملياتو کې اووه ملکي وګړي وژل شوي خو امنيتي ځواکونو د ځايي خلکو دغه ادعا کړې وه.
پژواک خبري ادارې د دغو عملياتو په اړوند د ځايي خلکو او پوليس د څرګندونو په اساس خبرخپور کړی ؤ.
د برمل د پوليسو مشر بريګيډيئر جنرل غلام سخي روغ ليوني ويلي په ولسوالۍ کې ترسره شوؤ عملياتو کې د درې عربو په ګډون ۱۵ طالبان وژل شوي وو.
د جنورۍ په مياشت کې د برمل ګورنر رحمت الله ادعا کړې وه چې د ډېورنډ پولې ته څېرمه د پاکستان د جنوبي وزيرستان انګور اډې ته نزدې پرتې ولسوالۍ برمل د نیمې نه زیات خلک د پاکستان شناختي کارډونه لري.
هغه ويلي ؤ ۸۸ زره ابادي لرونکې برمل ولسوالۍ کې خروټي او وزیر قبايل پښتانه اباد دي او دوي پاکستاني شناختي کارډونه لري.
