د پاکستان سپر ليګ څلورم د کواليفاير په سيالۍ کې د کوټه ګلېډي اېټرز لوبډلې د پېښور زلمي لوبډلې ته په ۱۰ رنزونو ماتې ورکړه او د کوټې لوبډله فاينل/ پايلوبې ته ورسېده.
د پېښور زلمي لوبډلې د کوټه ګلېډي اېټرز د ۱۸۶ رنزونو په مقابله کې په اووه لوبغاړو سوځېدو ۱۷۶ رنزونه جوړ کړه. دا سيالي د کراچۍ په نیشنل لوبغالي کې وشوه.
د پېښور لوبډلې په بېټسمېنانو کې زيات رنزونه کپتان ډېرن سمي ۴۶ او بيا پولارډ ۴۴ رنزونه جوړ کړه.
پېښور زلمي د سیالۍ پچه/ ټاس ګټلی او لومړی بيټنګ يې د کوټه ګلېډي اېټرز لوبډلې ته ورکړی ؤ.
د کوټې لوبډلې په لومړي بیټنګ کې په ټاکلو ۲۰ اوورونو کې په اووه لوبغاړو سوځېدو ۱۸۶ رنزونه جوړ کړي وو.
د کوټې په بېټسمېنانو کې زيات ۷۱ رنزونه شېن واټسن، احسن علي ۴۶ او عمر اکمل ۲۲ رنزونه جوړ کړي وو.
وهاب ریاض د کوټې دوه لوبغاړي سوځولي وو.
د پېښور زلمي لوبډله به اوس د کراچۍ او اسلام اباد لوبډلو ترمنځ کېدونکې سيالۍ کې د ګټونکې لوبډلې سره مخامخ کيږي.
په دغه سيالۍ کې ګټونکې لوبډله به په پايلوبه کې د کوټه ګلېډي اېټرز مقابله کوي.
د کراچۍ کنګز او اسلام اباد يونايټډ سيالي سبا د زيارت/ پنجشنبې په ورځ د کراچۍ په نيشنل لوبغالي کې ټاکل شوې ده، په ۱۵م مارچ به پايلوبې ته د رسېدو دپاره وروستۍ (ايليمينېټر سيالي کيږي.
د پي اېس اېل پايلوبه په ۱۷م مارچ د اتوار/ يکشنبې په ورځ ټاکل شوې ده.
