د پنجاب صوبې په مرکز لاهور کې د داتا دربار د مزار مخې ته د پوليس ګاډي سره نزدې په ځانمرګي بريد کې د وژل شوو شمېر اتو (8) ته رسېدلی، په وژل شوو کې پينځه پوليس دي.
د پنجاب صوبې د پوليس مشر عارف نواز پخلی کړی چې د دربار مخې ته ځانمرګی بريد شوی او د پينځه ؤ پوليسو په ګډون پکې ټول اته تنه وژل شوي دي.
هغه ويلي د ځانمرګي هدف د ايليټ پوليس غړي وو.
نوموړي زیاته کړه په چاؤدنه کې د اووه کلو پورې بارودي مواد کارول شوي دي، هغه ويلي که بریدګر د داتا دربار مزار ته ننوتلی ډېر تاوان به يې اړولی ؤ.
له دې وړاندې د لاهور پوليس مشر ډي ايي جي اپرېشن) اشفاق احمد خان په چاؤدنه کې د درېو پوليسو په ګډون د پينځو تنو د وژل کېدو او 24 ژوبلېدو ويلي ؤ.
هغه ويلي ؤد داتا دربار مخې ته د ايليټ پوليس ګاډی په چاؤدنه کې په نخښه کړی شوی دی.
د چاؤدنې له امله ژوبل کسان میو روغتون ته وړل شوي او امدادي ټيمونو ويلي په ژوبلو کې د اته پورې کسانو روغتيايي حالت خطرناک دی.
ډاکټر عزيز يوسفزی چې ځان د حزب الاحرار ډلې وياند معرفي کوي د چاؤدنې زمه واري يې منلې ده.
راپورونه وايي د بريد وروسته د داتا دربار د زايرينو دپاره تړل شوی او لارې يې ټول بندې کړی شوي دي.
د پنجاب صوبې وزیراعلی عثمان بزدار د پېښې نوټس اخيستی او د امنيت په موخه يې لوړ پوړې غونډه بللې ده.
د راپورونو ترمخه نوموړي نن د پنجاب صوبې د بېلابيلو سیمو خپل ټاکل شوې دورې هم ځنډولي دي.
