لاس رسیدونکی لینک

Breaking News

قریشي: د نوې صوبې لپاره د پنجاب د وېشلو پر سر مشورې روانې دي


واشنګټن: د پاکستان د بهرنیو چارو وزیر شاه محمود قریشي وايي، د پي ټي آی حکومت پرېکړه چې له پنجاب صوبې څخه د جنوبي پنجاب (سرایکي صوبې) د جلاکولو پرسر سیاسي خبرو ته لاره برابره کړي.

قریشي د شورو یا چهارشنبې په ورځ په ملتان کې یوې خبري غونډې ته وویل، پي ټي آي لا له مخکې څخه قامي اسامبلۍ ته ددې هدف لپاره د قانوني بدلون مسوده وړاندې کړې ده.

ده وویل، چې ددغه قانوني ترمیم د تصویب کېدو لپاره له دریو څخه دوه برخې اکثریت رایو اخېستلو ته اړتیا ده.

د بهرنیو چارو وزیر وویل، دوی له مخکې څخه د پاکستان له پیپلز پارټۍ سره په دې اړه مثبتې خبرې درلودې او زیاته یې کړه چې د پي ام ال ان او نورو ډلو سره هم سلا مشورې کېږي تر څو هغوی ددغه قانوني بدلون څخه ملاتړ ته وهڅول شي.

قریشي وړاندې وویل، په جنوبي پنجاب صوبه کې د ملتان، بهاولپور او دېره غازي خان سیمې شاملې دی او په صوبايي اسامبلۍ کې به یې د وګړو په تناسب شاخوا ۱۲۰ څوکۍ وي.

دا مهال د ټول پنجاب په صوبايي اسامبلۍ کې ۳۷۱ څوکۍ دی او له پنجاب څخه د سرایکي صوبې په جلاوالي سره به ترې ۱۲۰ څوکۍ کمې شي او د پنجاب د څوکیو شمېر به ۲۵۱ ته کمې شي.

د خیبر پښتونخوا په صوبايي اسامبلۍ کې ۱۲۴ څوکۍ دي خو د پخوانیو قبایلي سیمو لپاره ۳۱ څوکۍ پرې ورزیاتې شي او له دې سره به یې شمېر ۱۵۵ ته ورسېږي.

د قبایلي ضلعو لپاره د څوکیو د زیاتولو قانوني مسوده د پاکستان په قامي اسامبلۍ کې تصویب شوې او تر دې وروسته به په سېنېټ کې پاس کېدو ته وړاندې کېږي.

XS
SM
MD
LG