لاس رسیدونکی لینک

Breaking News

جنوبي وزيرستان: په مکين کې ماين چاؤدنې څلور ماشومان ژوبل کړي


د قبایلي ضلعې جنوبي وزيرستان په مکين علاقه کې په يوه ماين چاؤدنه کې څلور ماشومان ژوبل شوي دي، د چارواکو په وېنا دا پخوانی ماين په ناله کې پروت ؤ او چاؤدلی دی.

په جنوبي وزيرستان کې امنیتي چارواکو پخلی کړی چې په مکين کې د ماين چاؤدنې پېښه پرون د شورو، چهارشنبې په ورځ ناوخته رامنځته شوې او څلور ماشومان پکې ژوپل شوي دي.

چارواکو ويلي کم عمره ماشومان د ماين چاؤدنې ښکار شوي، اول د شمالي وزيرستان رزمک روغتون او بیا په ډېره اسماعيل خان کې پوځي روغتون ته منتقل کړی شوي هلته یې درملنه روانه ده.

د جنوبي وزيرستان په مکين کې په يوه اوونۍ کې دا دوېمه پېښه ده چې ماين چاؤدنه پکې کيږي، درې ورځې وړاندې يو تن په ماين ختلی او په چاؤدنه کې يې پښه ژوبل شوې وه.

په ياده علاقه کې د ماين چاؤدنو دا څلورمه پېښه ده.

د پښتون ژغورنې غورځنګ (پي ټي اېم) مشر منظور پشتين د مکین د پېښې په اړوند ټويټ کړی او ویلي يې دي پي ټي اېم د اولې ورځې نه دغه غوښتنه کوي چې ياده علاقه دې د ماينونو څخه پاکه کړی شي خو د دوي په دې غوښتنه سنجيده هڅې نه کيږي.

څلور ورځې وړاندې نوموړي په جنوبي وزيرستان کې د يوې بلې ماين چاؤدنې په غبرګون کې په ټويټر ویلي ؤ چې دا په تېرو دوه کلونو کې ۱۷۳ ماين چاؤدنه ده.

هغه ويلي ؤ دوي د ماينونو پاکولو غوښتنه کوي خو رياست لګيا دي د ماينونو په ځای پي ټي اېم لرې کوي.

خو د پاکستان پوځ او نورې امنيتي ادارې ادعاوې کوي چې په جنوبي او شمالي وزيرستان کې د دوي ټيمونه نزدې د تېرو دوه کلونو راهسې لګيا دي په دې ماينونو پاکولو کار کوي او د دوي پکې خپل عسکر هم قربان شوي دي.

XS
SM
MD
LG