په قطر کې د طالبانو د سياسي دفتر ویاند ويلي څلور کسيزه پلاوي يې د ايران سفر کړی او د دغه هېواد د لوړ پوړو چارواکو سره ليدلي او د سولې د پروسې په اړوند يې ورسره خبرې شوي دي.
سهېل شاهين ويلي د طالبانو پلاوي د ګل، دوشنبې په ورځ د ايران سفر کړی دی.
له دې وړاندې د طالبانو پلاوی ماسکو ته هم تللی ؤ.
په قطر کې د طالبانو د سیاسي دفتر پلاوي په داسې حال کې د روس او ايران سفرونه کړي چې امریکې د طالبانو سره د افغانستان د سولې خبرې ودرولي دي.
طالب وياند ويلي پلاوي يې د ايراني چارواکو سره د سولې د خبرو ترڅنګ په افغانستان کې د ايران د اقتصادي پروژو په اړوند خبرې کړي او ويلي يې دي طالبان د سولې د خبرو په عمل کې په ځانګړي ډول د ګاونډي هېوادونو رول ته د قدر په سترګه ګوري.
شاهين زياته کړې د ماسکو د سفر په مهال يې پلاوي د افغانستان دپاره د روس د ځانګړي استازي زميرکابلوف او نورو چارواکو سره ليدلي او د افغان سولې د خبرو په اړوند يې ورسره خپل موقف شريک کړی دی.
طالبانو په داسې حال کې د ايران او روس سفرونه کړي چې څو ورځې وړاندې د امریکا صدر ډانلډ ټرمپ په کابل کې د يو امریکايي پوځي او هغه سره د نورو کسانو د وژل کېدو وروسته د طالبانو سره د سولې د خبرو د ځنډولو ويلي ؤ.
