واشنګټن ـــ امریکا او شمالي کوریا د ایټمي وسلو پر سر د خبرو لپاره د ټاکلې مودې تر پای ته رسېدو وړاندې یو بل ته د زور د ښکاره کولو له خطر سره مخامخ دي ځکه کوریا ګواښ کړی چې د دې مودې له پای ته رسېدو وروسته به بیرته خپل ایټمي پروګرام پیل کړي.
د کوریایي پیپلز پوځ مشر پاک جونګ چون پرون د شمالي کوریا سرکاري مېډیا ته په ورکړي بیان کې ګواښ کړی چې د امریکې هر ډول پوځي اقدام ته به پخپل ځواک سره جواب ورکوي:
"یوه خبره باید څرګنده شي چې د پوځ د کارولو حق او امتیاز یواځې له امریکې سره نه دی، هر څوک پوهېږي چې که امریکې پر شمالي کوریا پوځي تېری وکړ نو څه جواب به ورکړل شي".
د کوریایي پوځ مشر دا څرګندونې د نېټو په سرمشریزه کې د ولسمشر ټرمپ هغو خبرو ته غبرګون دی چې وایي که کله هم اړتیا پېښه شوه نو د شمالي کوریا په ضد به له پوځي زوره کار واخلي. ټرمپ په لندن کې شمالي کوریا ته په اشارې سره ویلي وو:
"موږ اوس تر بل هر وخت زورور پوځ لرو او موږ اوس په نړۍ کې ځواکمن هېواد یو او موږ د دې زور کارولو ته هیله من نه یو، خو که وغواړو استعمال به یې کړو".
ولسمشر ټرمپ او کیم جانګ اون د شمالي کوریا د ایټمي وسلو د ختمولو پر سر دوې ناستې کړې او د دې تر څنګ په واشنګټن او پیانګیانګ کې هم د دواړو هېوادونو چارواکو په دې اړه خبرې کړې خو تر اوسه کوم تړون ته نه دي رسېدلي.
بل لور ته شمالي کوریا خبرداری ورکړی چې که ولسمشر ټرمپ د پیانګیانګ پارولو ته دوام ورکړ، نو دوی به هم د ولسمشر ټرمپ په اړه بیرته له سپکاوي ډکه ژبه وکاروي. د شمالي کوریا د بهرنیو چارو مرستیال وزیر چوی سن هوی دا خبرداری په داسې وخت کې ورکړی چې د دواړو هېوادونو تر منځ د خبرو د بیا پیلېدو امکان نه ښکاري:
"د اوس غوندې په حساس وخت کې که داسې ژبه او څرګندونې مخې ته راځي چې د جګړې فضا پیدا کوي دا ضرور باید د یو کمزوري ذهن نخښه وګڼل شي".
د 2017م کال په جنوري کې چې ډانلډ ټرمپ د امریکې د ولسمشر په توګه ټاکل شوی، د شمالي کوریا او امریکې تر منځ څو ځله داسې له ګواښه ډکې څرګندونې شوې او کارپوهان وایي چې دا وروستي ګواښونه د دواړو هېوادونو تر منځ د تاوتریخوالي د زیاتېدو نخښه ده.
د شمالي کوریا د بهرنیو چارو د وزارت یوه چارواکي ري تایسنګ د دسمبر پر درېیمه نېټه تور پورې کړ، چې وایي امریکه غواړي هېواد یې د ایټمي پروګرام په اړه مذاکراتو ته مجبوره کړي، چې وایي غواړي له دې سیاسي چلنده د 2020م کال په انتخاباتو کې ګټه واخلي.
شمالي کوریا په تمه ده چې د دسمبر تر 31مې له امریکې سره د ایټمي تړون په اړه موافقې ته ورسېږي، ښاغلی ري تایسنګ وایي دا اوس په امریکې پورې اړه لري چې د کرسمس په مناسبت څه سوغات ټاکي چې تر لاسه یې کړي.
امریکې د ایټمي پروګرام د ختمېدو پر سر له شمالي کوریا سره د اختلاف له کبله پر دې هېواد یو شمېر اقتصادي بندیزونه لګولي، چې د شمالي کوریا پر بیا بیا غوښتنې برسېره یې دغه بندیزونه پر ځای ساتلي.
