امریکايي پوځي چارواکو ويلي په اتمه جنورۍ چې ايران په عراق کې په دوه پوځي اډو د بېلسټک ميزايلو کوم بریدونه کړي دوی پکې په معجزانه توګه بچ پاتې شوي او په دغو بريدونو کې پوځي تاوان نه دی شوی.
ايران د خپل قدس ځواک د مشر جنرل قاسم سليماني د وژنې په بدل کې په عراق کې د امریکايي پوځ د استوګنې په دوه اډو عېن الاسد او اربيل د بېلسټک ميزايلو بريدونه کړي وو.
امریکې قاسم سليماني په درېمه جنورۍ په بغداد کې په يو ډرون بريد کې وژلی ؤ.
د امریکايي پوځيانو د استوګنې په اډو د بېلاسټک ميزايلو د بريدونو په اړوند د امريکې د هوايي ځواک يوې ښځينه افسرې لفټننټ کرنل اسټېکي کوليمنېن ويلي په دغو بريدونو کې بچ پاتې کېدل د معجزې نه کم نه ؤ او په دې بريدونو کې ورته تاوان نه دی اوښتی.
نوموړې د عراق په انبار ښار کې د دغو بريدونو په اړوند ژورنالسټانو ته حال ويلی دی.
په انبار کې د امریکا ۱۵۰۰ سرتيري موجود دي او مشري يې ښځينه افسره اسټېکي کوليمېن کوي.
د روئټرز ترمخه د ايران په بېلسټک ميزايل بريدونو کې په الاسد بېس کې ديوالونو او نور سامان ته تاوان اوښتي او پوځي سرتيرو ویلي د کومو ديوالونو شاته چې دوی پټ شوي هغه هم تباه شوي دي.
يو بل پوځي چارواکي ټومي کالډويل ويلي د بريد نه څو ساعته وړاندې دوی ته د بريد په اړوند خبر ترلاسه شوی ؤ.
کوليمېن ويلي د شپې په لس بجې دوی ته خبر ترلاسه شوی او دوی خوندي ځای ته منتقل شوي او بيا نزدې درې نيم ساعته وروسته ميزايلې داغل پېل شوي وو.
د عراق چارواکو ويلي ايران ۲۲ ميزايلې داغلې وې چې پکې ۱۷ په الاسد اډه ويشتل شوې وې.
يو بل چارواکي ويلي دوی د هيلي کاپټرو په بنکرو کې پټ شوي او هلته دوی شايد د اووه يا اته ساعتونو پورې ناست وو.
کوليمېن ويلي دوی اورېدلي وو چې ملېشه به راکټې داغي او دوی د هغې نه ويره نه لرله خو د بېلسټک ميزايلو بريدونه د دوی دپاره حېرانوؤنکي وو.
د يادو بېلسټک ميزايلو د بریدونو وروسته امریکې په ايران نور سخت اقتصادي بندېزونه لګولي دي.
