د افغانستان غزني ولایت په ده یک ولسوالۍ کې د غورځیدلې الوتکې په اړه د امریکا د هوايي ځواک قومندان جنرال ډیویډ ګولډفین ویلي دغه لویدلې الوتکه د امریکا د پوځ اړوند ده.
د امریکا د هوايي ځواک دې قومندان دا څرګندونې په واشنګټن کې له خبریالانو سره په خبرو کې کړي دي.
جنرال ډیویډ ګولډفین د اي ۱۱ اې ډوله الوتکه کې د وژل شویو کسانو د شمېر اوهمداراز د الوتکې د سقوط په اړه څه نه دي ویلي او د دې جنرال په وینا د دې پېښې نور جزیات به وروسته په ډاګه کړي.
خو رویټرز ته یوه امریکايي چارواکي د نوم نه ښودلو په شرط ویلي په لویدلې الوتکه کې ترلسو پورې کسان سپاره وو.
د امریکا د دفاع وزیرمارک اسپر د الوتکې د نسکوریدو له پیښې ځان خبر ګڼلی او افغانستان کې د ناټو ځواکونو هم په غزني کې د دې خبرې پخلی کړی چې الوتکه د امریکا اړوند ده او رسنیو ته یې په لیږلو معلوماتو کې د پیښې نور جزیات نه دي ورکړي .
افغان چارواکو پرون ویلي و چې الوتکه د غزني ده یک ولسوالۍ د سیدو خیلو سیمه کې چې یاده سیمه د طالبانو ترکنټرول لاندې ده لویدلې وه.
وسله واله والو طالبانو ادعا کړې چې د الوتکه د امریکا د پوځ اړونده ده او د دوی د جنګیالیو لخوا ویشتل شوې ده.
په افغانستان کې د امریکايي ځواکونو په خپاره شوې بیان کې د الوتکې دویشتلو په اړه د طالبانو شوې ادعا رد کړې ده او ویلي دي چې هیڅ داسې شواهد تراوسه نشته چې الوتکه دې د دښمن لخوا ویشتل شوي وي او په وینا یې د پیښې په اړه څیړنې روانې دي.
د غزني ولایتي شورا مرستیال امان الله کامراني امریکا غږ ډیوې ته ویلي د امریکا او ایران ترمنځ د رامنځته شوې کړکیچ وروسته ایران له طالبانو سره اسخباراتي معلومات پیاوړې کړي او د الوتکو د ویشتلو پرمختللې وسلې هم ترلاسه کړې دي.
نوموړي وویل "زما په نظر طالبان څنګه خبر شول چې د الوتکه د امریکا اړونده ځکه په د سیمې هره ورځ په لوړه ارتفاع کې لسګونه الوتکې تګ راتګ کوي تر ټولو مهمه دا ده چې د الوتکه په کومه وسله وویشتل شوه ښکار ده خبره ده چې د طالبانو ته ایران د الوتکو د ویشتلو ضد وسلې ورکړي دي او ښه بیلګه یې د افغانستان د پوځ اړوند په دې وروستیو کې د یو شمېر الوتکو سقوط دی چې طالبانو یې د ویشتلو ادعا کړې ده".
طالبانو ویلي چې په الوتکه کې ګڼ شمېر امریکايي مامورین وژل شوي خو یو امریکايي چارواکي ویلي چې په دې پیښه کې جګپوړي چارواکي نه و سپاره.
