کراچۍ —
په پاکستان کې د سرکاري شمېرو ترمخه تراوسه پورې په ۴۰۷۲ کسانو کې د کرونا وايرس پخلی شوی، دې وايرس په ملک کې ۵۸ کسان مړه کړي دي.
سرکاري شمېرې ښايي چې دا وخت په کرونا وايرس د اخته ۲۵ کسانو روغتيايي حالت خطرناک دی، او تراوسه پورې ۴۶۷ کسان د دې وايرس نه ښه شوي هم دي.
دولتي شمېرې وايي په تېر ۲۴ ساعتونو کې په ملک کې د کرونا وايرس ۲۰۸ پېښې مخې ته راغلي، څلور کسان مړه شوي او ۳۰۷۶ ټېسټونه شوي دي.
پاکستان وايي تراوسه پورې د کرونا وايرس ۴۲ زره، ۱۵۹ ټېسټونه کړي دي.
په پنجاب صوبه کې د کرونا وايرس تر ټولو زیاتې پېښې مخې ته راغلي چې شمېره يې ۲۰۳۰ ده، په سند کې ۹۲۳، په خېبرپښتونخوا کې ۵۰۰، په ګلګت بلتستان کې ۲۱۱، په بلوچستان کې ۲۰۲، په اسلام اباد کې ۸۳، او په ازاد کشمير کې په ۱۹ کسانو کې د کروناوايرس پخلی شوی دی.
