لاس رسیدونکی لینک

Breaking News

دپاکستان اؤ افغانستان ترمنځ دسوداګرۍ دوه مهمې لارې پرانستل شوې


دافغانستان اؤ پاکستان دتجارت دوه مهمې لارې انګور اډه او ډنډپټان چې دکرونا وایرس له امله تړل شوي وې، بېرته د دوه اړخیزې سوداګرۍ پرمخ پرانستل شوې.

دافغانستان اؤ پاکستان دتجارت دوه مهمې لارې انګور اډه او ډنډپټان چې دکرونا وایرس له امله تړل شوي وې، بېرته د دوه اړخیزې سوداګرۍ پرمخ پرانستل شوې.

د پکتیکا والي مجیب الرحمن څمکني له وي او ای ډيوه سره په خبرو کې وویل، د انګور آډې لاره تېره ورځ پرانستل شوې ، خو د پخوا په پرتله د خلکو او موټرو تګ راتګ هومره زیات نه دی .

ښاغلي څمکني زیاته کړه "زموږ له خوا څخه تر پنځوؤ موټرو پورې ددې لارې کوزې پښتونخوا ته اوښتي ، خو د پاکستان له لوري تر اوسه تجارتي توکي په دې لاره افغانستان ته نه دي راغلي"

ښاغلی څمکنی دا هم وايي چې ولسونه ددغه کار څخه زیات خوشاله دي او د نرخونو په کڼټرول او د جنوب په اقتصاد باندې ښه اغېزه لرلی شي .

د پکتيا د سوداګرۍ د خونو رئيس عبدالنصير عالميار هم امريکاغږ سره په خبرو کې وويل چې پر ډيورنډ کرښې د ډڼډ پټان لاره پرانستل شوې ، چې تر دې مهاله د کوزې پښتونخوا څخه پینځه لارۍ وریژې را واردې شوي دي .

د پکتیا او پکتیکا تجاران هم ددغه لارو د پرانستل کیدو څخه خوشاله دي ، او وايي چې په دې سره به د دوی کاروبار ښه او خلکو ته به د کار زمینه هم برابره شي .

د اقتصادي چارو کارپوهان هم له پاکستان سره د سوداګریزو توکو پرمخ د لارو پرانستل د دواړو هیوادونو د اقتصادي بقا او خپلو تولیداتو ته د بازار موندنې لپاره ګټور اقدام بولي .

د اقتصادي چارو شنونکی نواب امیرزی وايي ، چې افغانستان ددې لارو په خلاصون سره دسیمې هیوادونو سره تجارت ته لار پیدا کوي .

ښاغلي امیرزي امریکا غږ ته زیاته کړه"دغه ټولې لارې د هیواد د اقتصاد لپاره ښې تمامیږي ،د خلکو په دسترخوان کې تغیر راځي او دلته خلک په کار باندې اخته کیږي او د خپلو تولیداتو د ډیرولو سبب کیږي"

دا په داسې حال کې ده چې افغان ولسمشر محمد اشرف غني تېره میاشت د هیواد له والیانو سره په یو ویدیو کنفرانس کې اړوندو ادارو ته سپارښتنه وکړه ، چې له پاکستان سره د مهمو اقتصادي لارو د خلاصون لپاره لاس په کار شي ، چې له مخې یې ځينې مهمې لارې پرانستل شوې.

له دې جملې د تورخم او غلام خان بندرونه چې شاوخوا درې مياشتې مخکې د کرونا ويروس د خپرېدو له وېرې تړل شوي وو،چې نزدې درې اوونۍ مخکې په دوه اړخيزه توګه د بار وړونکو موټرو پر مخ پرانستل شول،

خو په پرتله یې بیا دچمن اؤ‌ سپین بولدک تجارتي لاره د تجارت اؤ دخلکو دتګ راتګ دپاره فعاله نه ده.

د کندهار د والي ویاند احمد بهیر احمدي د معلوماتو له مخې چې دوی کاملا د لارې خلاصون ته اماده دي ،خو پاکستاني چارواکي ددې لارې تړل کیده او نه خلاصول د خلکو مظاهرې په ګوته کوي .

احمدي امریکا غږ ته ویلي ، چې پاکستاني چارواکو د دوی کمیسیارۍ ته ویلي ، چې په چمن کې چې د دوی اړوند سیمه ده ،خلکو مظاهرې کړي ،چې له امله یې دوئ نشي کولی د مظاهرو په ترڅ کې یاده لاره پرانیزي .

XS
SM
MD
LG