لاس رسیدونکی لینک

Breaking News

افغانستان: په درو جلا پېښو کې 10 عام کسان وژل شوي 11 ټپیان شوي


واشنګټن ـــــ د امریکې، یورپي هېواد او ملګرو ملتونو له خوا په افغانستان کې د تشدد د کموالي پر غوښتنې برسېره امنیتي پېښې دوام لري او پرون د دې هېواد په درو ولایتونو کې په جلا- جلا پېښو کې 10 تن عام وګړي وژل شوي او یوولس تنه ټپیان شوي دي.

د غزني د والي ویاند وحیدالله جمعه زاده وایي، د شنبې- خالي په ورځ د جغتو ولسوالۍ په دره قیاق سیمه کې د سړک له غاړې ښخ شوی ماین چاودلی چې وايي شپږ تنه پکې وژل شوي او اتنه نور پکې ټپیان شوي دي.

د جمعه زاده په وینا په پېښه کې وژل کسان عام خلک دي چې وایي ښځې او ماشومان هم پکې شامل دي.

د دې چاودنې ذمه واري کومې وسلوالې ډلې پر غاړه نه ده اخیستې.

بل لور ته په وردګو ولایت کې د یوه کور درې تنه د هاوان (مارټر) د ګولې په چاودنه کې وژل شوي دي.

د وردګو ولایت د والي ویاند محب الله شریف زی وایي، دا پېښه د سید اباد ولسوالۍ په سلطان خېل کلي کې شوې ده، چې وایي یو سړی او د هغه دوه زامن پکې وژل شوي دي.

تر اوسه دا نه ده څرګنده چې د مارټر دا ګوله چا ویشتلې ده، د والي ویاند وایي په دې اړه یې پلټنې روانې دي خو د پېښې په ځای کې را غونډو شوو خلکو پر حکومت تور لګولی دی.

همدارنګه په پکتیا ولایت کې هم د ماین یوه چاودنه شوې چې یو تن پکې وژل شوی او درې نور ټپیان شوي‌ دي.

د پکتیا د امنیتي چارو مشر لطف الله کامران وایي، چاودنې پرون ماسپښین مهال مرکزي ښار ګردېز ته نیژدې د کابل پر لوی سړک د ښخ شوي ماین له کبله شوې ده.

د کامران په وینا چاودنه د افغانستان د ملي امنیت ادارې پر موټر شوې چې وایي د دې ادارې یو کارکوونکی پکې وژل شوی دی. تر اوسه د دې چاودنې ذمه واري‌ هم کومې وسلوالې ډلې پر غاړه نه ده اخیستې.

XS
SM
MD
LG