د افغانستان ولسمشر اشرف غني ویلي، د لوی اختر د څلورمې نه هغه 500 طالب بندیوان خوشي کوي چې د طالبانو د 5000 بنديوانو د فهرست نه علاوه دي.
اشرف غني دغه اعلان نن د جمعې په ورځ په صدارتي ماڼۍ ارګ کې د لوی اختر د نمانځه نه پس وکړو.
ولسمشر غني وويل طالبانو د لوی اختر په موقع اوربند کړی د هغې په بدل کې دوی په ښه نيت او سولې د عمل په لار کې د خنډانو لرې کېدو په موخه 500 طالب بندیوان خوشي کوي.
اشرف غني د طالبانو لخوا د اوربند هرکلی وکړو او وی ويل دغه اوربند ته دې دوام ورکړی شي.
نوموړي په طالبانو غږ وکړو چې څومره زر وي د افغان حکومت سره دې مذاکرات پېل کړي.
ښاغلي غني د طالبانو د 400 بنديوانو په اړه وويل طالبانو چې دوی ته کوم فهرست ورکړی په هغې کې 400 داسې دي چې په مختلفو جرمونو کې ککړ دي د قانون ترمخه هغه نه شي کولی چې دغه 400 تنه خوشي کړي.
هغه زياته کړې د دغو کسانو په اړه به د مشورې دپاره د اولسي استازو سره مشوره وکړي.
د فرورۍ په میاشت کې د امریکا او طالبانو ترمنځ د افغانستان د سولې په شوې موافقنامه کې ويل شوي ؤ چې افغان حکومت به د طالبانو 5000 بنديوان او طالبان به د افغان حکومت 1000 بنديوان خوشي کوي.
