لاس رسیدونکی لینک

Breaking News

په پاکستان کې د ماشومانو د ځورونو پېښې 14 فيصده سېوا شوي، ساحل


په پاکستان کې د ماشومانو د حقونو دپاره کار کوونکې غېر دولتي اداره ساحل وايي، په ټول ملک کې روان کال په لومړو شپږو مياشتو کې د ماشومانو د ځورونو ټولې 1489 پېښې رپورټ شوي دي.

يادې ادارې د ماشومانو د ځورونو په اړه د روان کال 2020م د لومړيو شپږو مياشتو په رپوټ کې ويلي د کرونا وبا له امله د ماشومانو د ځورونو په پېښو کې سېوا والی شوی دی.

د رپورټ ترمخه د ماشومانو د ځورونو په پېښو کې 331 د تښتونو، 233 د ماشومانو سره د ناوړه چلند، 168 د بې درکه کولو، 160 د جنسي تيري، 134 د جنسي تيري د هڅو، 104 په شريکه د ناوړه چلند، 93 د ناوړه چلند د هڅو، 69 په ګډه د جنسي تيري او 59 ماشومانو سره د ودونو پېښې ثبت شوي دي.

په ځورول شوؤ ماشومانو کې 53فيصده شمېره د جینکو او 47 فيصده د هلکانو ده.

د ساحل مشره منېزی بانو وايي دا د نيم کال رپوټ دی چې دومره سېوا شمېرې پکې مخې ته راغلي دي.

وي او ای ډيوه سره په خبرو کې يې وويل، د دوی په وړاندې يوه ښه خبره مخې ته راغلې چې دا پېښې اوس رپورټ کيږي خلک يې شکايت کوي او رپورټ يې درج کوي.

د منېزې بانو په وېنا په پاکستان کې د ماشومانو په اړه هر ډول قوانين شته خو د وخت سره په دې کې ښه والی او بدلون کېدی شي.

دوېم دا چې د ځورونې په پېښو کې دې ګواه ته تحفظ ورکړی شي او کوم خلک چې په دې پېښو کې ککړ وي په سرکاري توګه دې د هغو د مالوماتو درج کولو يو رجسټرډ جوړ شي چې دغه خلک وپېژندې شي هغه که هر څوک وي خو چې مالومه يې شي چې دا د ماشومانو سره تېری کوونکی تن دی.

د ماشومانو د حقونو دپاره کار کوونکی عمران ټکر وايي، د ماشومانو د حقونو دپاره قوانين په خپل ځای سم دي، خو رياست له پکار ده چې د ماشومانو د حقونو د خوندي ساتلو او هغوی د تيريو څخه ژغورلو په لړ کې د ځان سره په ټولنه کې د جومات مُلا، د سکول استاز او د علاقې مشر په اعتماد کې واخلي او د دې ناوړه تېریو د مخنيوي په لړ کې په شريکه کار وکړي.

ساحل په خپل رپوټ کې ويلي په ځانګړي ډول د ماشومانو سره د جنسي تيريو په پېښو کې د دوی ګاونډيان، خپلوان، ملايان، استازان، پوليس او دوکانداران ککړ مالوم شوي دي.

د ساحل ترمخه د کال 2009م په لومړيو شپږو مياشتو کې د ماشومانو د ځورولو 1304 پېښې مخې ته راغلې وې، د کوم په حساب چې سږ کال دا پېښې 14 فيصده سېوا شوي دي.

XS
SM
MD
LG