د پاکستان پوځ ویلي د شمالي او جنوبي وزيرستان په پوله پرته علاقه ګړيوم کې يې په عملياتو کې يو ترهګر کمانډر سره د درېو ترهګرو وژلی دی.
پوځ د اتوار/ يکشنبې په ورځ ناوخته ويلي مهم پرمختګ يې کړی، د شمالي او جنوبي وزیرستان په ګړيوم شکتویې سيمه کې يې د استخباراتي مالوماتو په اساس عمليات کړي، ترهګر کمانډر احسان الله (سڼی) يې سره د درېو نورو ترهګرو وژلی دی.
پوځ دعوه کړې چې احسان الله سڼی د څو ترهګرو عملیاتو مرکزي کردار ؤ.
د پوځ د بيان ترمخه هغه په وروستيو کې په شکتويې کې په ترهګرو بريدونو کې ککړ پاتې شوی په کومو کې چې لفټننټ نثار او کېپټن صبيح سره د څو نورو سرتېرو وژل شوي وو.
په شکتويي کې نزدې لس ورځې وړاندې د پوځ په يو ګاډي چاؤدنه شوې چې پکې د پوځ په وينا د يو افسر په ګډون درې سرتیري وژل شوي وو.
د ياد بريد زمه واري پاکستاني طالبانو منلې، او پوځ ویلي په علاقه کې يې د پېښې وروسته د لټون عملیات پېل کړي وو.
د يادې پېښې وروسته د علاقې خلکو ویلي ګرځبنديز لګول شوی او تور يې لګولی امنيتي سرتيرو پرې تشدد هم کړی دی.
پوځ په علاقه کې د عملياتو ګرځبنديز او خلکو د نيولو په اړه په خپله څه نه ؤ ويلي خو امنيتي سرچينو په علاقه کې ګرفتاريانې منلې او بيا يې د خوشي کولو هم منلي وو.
په علاقه کې د ګرځبنديز او تشدد پرضد خلکو احتجاجي مظاهرې هم کړې وې.
