لاس رسیدونکی لینک

Breaking News

د مسلم ليګ ن د نوازشریف او مريم نواز په اړه د جنرل باجوه سره خبرې؟


د پاکستان د پوځ ویاند مېجر جنرل بابر افتخار ویلي، د مسلم ليګ ن یو مشر "محمد زبېر دوه ځله د پوځ د مشر سره ليدلي، او په دواړه ليدنو کې يې د نواز شریف او مريم نواز په اړه خبرې اترې شوي دي".

د پوځ وياند (ای ار وايي) ټيلي ويژن سره په خبرو کې وويل، "د محمد زبېر د پوځ د مشر سره يو ځل ليده کاته د اګست په وروستۍ اوونۍ او بل يې بيا په اووم ستمبر شوی چې پکې د ايي اېس ايي مشر هم موجود ؤ او دواړه ملاقاتونه د هغه په خواست شوي دي".

هغه زياته کړه "په دغو ليدنو کې هغه د ميا نواز شريف او مريم نواز په اړه خبرې کړي دي او پوځي مشر هغه ته بيا په ډاګه کړې ده چې د هغو قانوني مسلې دې هغه به د پاکستان په عدالتونو کې حل کيږي او سياسې مسلې په پارلیمان کې، د دغو معاملاتو نه دې پوځ لرې وساتل شي".

پوځي وياند وويل هغه په دغې اړه نور څه ويل نه غواړي.

محمد زبېر د مسلم ليګ ن مشر او سيند صوبې ګورنر پاتې شوی دی.

نوموړي د (جيو) ټيلي ويژن سره په خبرو کې ويلي هغه د پوځي مشر نه کومه مرسته نه ده غوښتې او د هغه د پوځي مشر سره شخصي اړيکې دي.

هغه وويل هغه کله هم د پوځ نه مرسته نه ده غوښتې او د پوځي مشر سره په ليدنه کې يې هغه ته په ښکاره ویلي چې هغه د کومې مرستې اخستو دپاره نه دی راغلی، يواځې د معيشيت په اړه يې د هغه سره خبرې شوي دي.

په ټولنيزو رسنیو داسې پوښتنې راولاړې شوي چې پوځ دغه خبره ښکاره کړه چې د مسلم ليګ ن یو مشر د پوځي مشر سره ليدلي اوس پکار ده چې مسلم ليګ ن هم سپيناوی وکړي.

ژورنالسټ مظهرعباس ويلي،

"دا ښه شوه چې د پوځ وياند د مسلم ليګ ن د مشر نوم اخستی چې دوه ځله يې د پوځي مشر سره ليدلي او نواز شريف او مريم نواز د قضيو په اړه یې ورسره خبرې کړي. د زبېر دريځ ډېر کمزوری دی. پکار ده چې مسلم ليګ ن مخې ته راشي سپيناوی وکړي يا ومني چې اېن ار او يې غوښتې وه".

د مسلم ليګ ن يو مشر د پوځ د مشر سره دا ليدنې په داسې حال کې شوي چې په وروستيو کې د پاکستان پيپلز ګوند په مشرۍ يو ټول ګونديز غونډه شوې او په دې غونډه کې د پوځ په سياسي کردار نيوکې شوې وې.

له دغې وروسته د پاکستان تحریک انصاف حکومتي وزيرانو ويلي چې د يادې غونډې نه وړاندې د مخالفه ګوندونو مشرانو د ګلګت بلتستان په اړه د پوځ د مشر سره ليدلي او د پوځ مشر ویلي ؤ چې پوځ په سياست کې هیڅ رول نه لري ځکه په پوځ دې د سیاست په اړه داسې نيوکې ونه شي.

خو د پاکستاني پوځ له مشر جنرل قمر جاوید باجوه سره تر تړلي دې بیان وروسته، چې د پوځ په سیاست کې څه کردار نشته، د مسلم لیګ نواز ګوند مرستیالې مشرې مریم نواز ویلي، پوځ ته پکار هم نه ده چې سیاسي فیصلې وکړي او د فیصلو اختیار باید چې پارلیمان سره وي نه چې له جي اېچ کیو سره.

د شورو- چارشنبې په ورځ د ایون فیلډ په مقدمه کې عدالت ته له حاضرېدو وړاندې مریم نواز له مېډیا سره د خبرو په وخت ویلي دي چې ګلګت بلتستان سیاسي مسئله ده او سیاسي مسئلې باید په پارلیمان کې حل شي نه چې د پوځ په مرکز کې.

مریم نواز له جنرل قمر جاوید باجوه سره د سیاسي مشرانو له ملاقاته بې خبري ښودلې خو دا یې ویلي، نه خو د پوځ مشر ته پکار دي چې سیاسي مشران داسې ملاقاتونو ته ور وغواړي او نه سیاسي مشرانو ته پکار دي چې د سیاسي مسئلو د حل د پاره له پوځ سره ملاقاتونه وکړي.

XS
SM
MD
LG