افغان چارواکو ویلي د ننګرهار په مرکز جلال اباد کې د فټ بال په لوبغالي کې د زرګونو په شمېره کې خلک راټول شوي چې د پاکستان د ویزې ترلاسه کولو ټوکن واخلي او په دغه ګڼه کې بيا د 11 ښځو په ګډون 15 تنه مړه شوي دي.
رايټرز د دوه افغان چارواکو له قوله ويلي د فټ بال په لوبغالي/ ګراؤنډ کې درې زره تنه موجود وو چې پکې ښځې هم وې او په دغه وخت کې زياته ګڼه جوړه شوې او کسان پکې مړه شوي دي.
د ننګرهار د شورا غړي سهراب قادري په پېښه کې د 15 تنو د مړينې ويلي چې پکې 11 ښځې هم شامل دي. هغه ويلې نور د پاخه عمر کسان په ګڼه کې ژوبل شوي هم دي.
پاکستان د افغانستان نه د زرګونو په شمېره کې خلک په ويزو راځي چې پکې علاج يا ډاکټر له راتلونکي، زده کوونکي او کاروباريان هم شامل وي.
د افغانستان او پاکستان ترمنځ د تګ راتګ دپاره د کرونا وبا له امله د څو مياشتو مودې نه ويزې ورکول بند ؤ.
خو په کابل کې د پاکستان سفير منصور احمد خان په وروستيو کې ويلي ؤ په 12م اکتوبر په کابل کې د پاکستان سفارتخانې 2059 افغانانو ته ويزې ورکړې وې.
هغه ویلي ؤ دوی په دې کار کوي چې د ويزو ورکول اسان کړي او زياته کړې يې وه چې د نن څخه به په کونسلګرو کې هم ويزې ورکول پېل کړي.
په افغانستان کې په کابل، جلال اباد او مزار شریف کې د پاکستان ويزې ورکول کيږي او تل د ويزو په ورکولو کې د بد انتظامۍ شکايتونه مخې ته راځي.
