لاس رسیدونکی لینک

Breaking News

د افغان حکومت پلاوی د طالبانو سره خبرو دپاره دوحې ته روان شوی


د افغانستان د حکومت مرکچی پلاوی د طالبانو سره د بېن الافغاني خبرو د دوهم بړاؤ دپاره دوحې ته روان شوی دی، د حکومتي پلاوي او طالبانو ترمنځ په خبرو کې د 20 ورځو وقفه نن پوره کيږي.

د افغان حکومتي پلاوي يو غړي او وياند نادر نادري د دوحې د تګ په اړه نن په پينځمه جنورۍ په ټویټر ويلي، ،

"د افغانستان اسلامي جمهوریت مرکچي پلاوي په کابل او ولایتونو کې د دولت له مشرتابه، ملي مصالحې عالي شورا له غړو، سیاسي او مدني فعالانو، دیني علماوو او د هېواد له نورو پاړکو سره له درې اوونیو سلا مشورو وروسته نن د سولې خبرو پیل کولو په موخه، له کابل څخه د دوحې په لور روان شو"​.

نوموړي په بل ټويټ کې ویلي،

"د افغانستان مرکچي پلاوی، په بریالۍ توګه د سولې خبرو دویم پړاو د پیل لپاره، له لازمو نظریاتو او لارښوونو برخمن شوی، څو په هېواد کې د سراسري سولې ټینګښت په موخه، خبرې له سره پیل کړي. د مشورو پرمهال روښانه شوه چې اوربند د افغانستان د خلکو لومړنۍ غوښتنه ده".

د افغان حکومتي پلاوي او طالبانو ترمنځ د بېن الافغاني خبرو دوهم پړاؤ په داسې حال کې پيلږي چې د افغانستان د سولې د خبرو دپاره د امریکا ځانګړي استازي زلمي خليلزاد هم ويلي د دوحې او سيمې په سفر روان شوی دی.

هغه ويلي، "زه دوحې او سیمې ته پدې تمه ستنېږم چې خواوې به د افغانستان د سولې مذاکراتو په راتلونکي پړاو کې محسوسه پرمختګ وکړي".

د امریکې د بهرنیو چارو وزارت پرون په څلورمه جنورۍ ويلي، د افغانستان د سولې دپاره د امریکا ځانګړی استازی زلمی خليلزاد په درېمه جنورۍ د سويلي او منځنۍ اسيا ترڅنګ د منځني ختيځ په سفر روان شوی دی.

سټېټ ډيپارټمنټ ويلي، خليلزاد به په دوحه کې د افغان ډلو سره وويني دوی به وهڅوي او د امريکا د ملاتړ وړانديز به وکړي چې د سولې عمل ګړندی کړي، تشدد کم کړي اوربند وکړي او زر تر زره د سياسي تګلارې او د واک شريکې دپاره معاهده وکړي.

په بيان کې ويل شوي خليلزاد به د افغانستان ګاونډيان هم وهڅوي چې د افغانستان د سولې ملاتړ وکړي چې تشدد ختم شي او زر تر زره سياسي جوړ جاړی وشي.

XS
SM
MD
LG