لاس رسیدونکی لینک

Breaking News

د طالبانو پلاوي د ايران سفر کړی


طالبانو ویلي په قطر کې د سیاسي دفتر مشر ملا برادر په مشرۍ يې يو پلاوي نن د نهې/سه شنبې په ورځ [26 جنورۍ] د ايران سفر کړی دی.

په قطر کې د طالبانو د سياسي دفتر وياند محمد نعيم د طالبانو د پلاوي د ايران د سفر په اړه ویلي، طالبانو د ايران په بلنه دغه سفر کړی دی.

هغه ويلي د طالبانو پلاوی به د ايراني چارواکو سره په ايران کې د مېشتو افغان مهاجرينو او افغانستان او سيمې په روانو سياسي او امنيتي حالاتو خبرې اترې وکړي.

طالبانو له دې وړاندې هم د ايران سفرونه کړي دي.

امریکا د وړاندې نه په ايران تورونه لګولي چې ايران په افغانستان کې د طالبانو او نورو ترهګرو ملاتړ کوي او د القاعده مشران ساتي.

ايران دغه تورونه رد کړي وو.

روانه مياشت د امريکا د بهرنيو چارو وزير مايک پمپيمو بيا په ايران تور لګولی ؤ چې ايران د القاعده سره پټې اړيکې ساتي او په څو ايراني چارواکو يې نوي بنديزونه لګولي وو.

طالبانو په وروستيو کې د پاکستان سفر هم کړی ؤ.

طالبانو په داسې وخت کې د ایران سفر کړی چې د امریکا د ملي امنيت سلاکار جېک سولوين د جمعې په ورځ ويلي چې امریکا اراده لري چې د فرورۍ 2020 د امریکا او طالبانو توافقنامې ته بيا کتنه وکړي او ارزونه به کوي چې طالبانو د نورو ترهګرو ډلو سره د اړيکو پرې کولو ژمنه پورې کړې؟، په افغانستان کې يې تشدد کم کړی او د افغان حکومت او نورو شريکانو سره يې معني خېزې خبرې روانې کړي دي که نه دي.

بل لور ته د روانې مياشتې په لومړو کې په قطر کې د افغان طالبانو او افغان حکومتي استازو ترمنځ د خبرو دوهم پړاؤ پېل شوی خو تراوسه پورې په دغو خبرو کې کوم ښکاره پرمختګ نه دی شوی.

XS
SM
MD
LG