لاس رسیدونکی لینک

Breaking News

بلوچستان: د شاهرګې سيمې د کولې په کان کې څلور مزدوران مړه شوي


کوټه ــــ د بلوچستان د هرنايي ضلعې مرستيال کمیشنر وريندر لال وایي د کولې په یو کان کې په ناقانونه توګه دغه څلور مزدوران د کولې د را ايستلو لپاره لاندې کښته شوي وو او هلته د زهرجن ګېس ميتېن د جمع کېدو له امله چاودنه شوې، چې څلور مزدوران پکې مړه شوي‌ دی.

"د مزدورانو چې کوم د کولې کیندنې مشين ډريلر دی هغه لمبه کړې او هم له دې وجې هلته چاودنه شوې او څلور تنه پکې مړه شوي".

د وريندر لال په خبره د مړه شوو کسانو جسدونه يې له کانه را ايستلي او له ضروري کاغذي کاروايي وروسته به يې د پښتونخوا سوات سیمې ته خپلو کورونو ته لېږي.

وريندر لال وويل په کوم کان کې چې دغه پېښه شوې دا کان حکومت له اوله بند کړی وو. هغه وويل د کولې د کان مالک د مزدورانو د ژوند د خوندي ساتلو لپاره ضروري لارې نه وې خپلې کړې ځکه حکومت د هغه کان يا درنګ له اوله بند کړی وو.

د وریندر په خبره دغه څلور تنه پټ او په ناقانونه توګه دې کان ته کښته شوي وو چې دغه پېښه وشوه:

"د ماينز ايکټ د 192 مادې په بنیاد دا کان موږ بند کړی وو، خو دا خلک بيا هم هلته داخل شوي وو، اوس د ماين انسپيکټر هلته موجود دی، رپورټ يې جوړ کړی دی، د ذمه واره ټېکه دار په ضد به پلټنې کوو او د قانون مطابق به د هغه په ضد کاروايي کوو".

د کولې د مزداورانو لپاره د کارکوونکې اتحاديې پاکستان لېبر فيډرېشن مشر سلطان "لالا" وي او اې ډيوه ته وويل، روان کال په پاکستان کې د کولې په کانونو کې نهه پېښې شوې دي، چې شل تنه د کولې مزدوران پکې مړه شوي دي، وایي يواځې د بلوچستان په شپږو پېښو کې 11 تنه مزدوران مړه شوي دي.

د سلطان لالا په خبره په تېر 2020م کال کې په ټول پاکستان کې د کولې یا سکرو په کانونو کې 205 تنه مزدوران د کار په مهال مړه شوي دي چې په بلوچستان کې د مړه شوو شمېر 105 وو، خو سلطان "لالا" وایي د ډېرو نورو د مړینې شمېر معلوم هم نه دی، هغه وويل:

"د کويلې په کانونو کې د خواريکښو د ژوند د خوندي ساتلو د اسبابو کمی، د حکومتي چارواکو بې غوري د داسي پېښو سبب کېږي".

د بلوچستان د معدنياتود څانګې حکومتي چارواکي دعوه لري چې حکومت د کولې په کانونو کې د مزدورانو د مړینې د مخنیوي لپاره ګامونه اخلي. وایي تېر کال چې شاوخوا سل مزدوران د بلوچستان په کانونو کې مړه شوي هغوی کېسونه په عدالتونو کې دي.

چاوراکي وايي د ايالت اوسني حکومت یوه قانوني‌ مسوده منظوره کړې چې جرمانې یې ډېرې زیاتې کړې دي، حکومت هڅه کوي د هر کان مالک مجبوره کړي چې په کانونو کې د تحفظ سامان لکه ګېس، ټیسټران او د آکسیجن اخیستو شیان کښېږدي.

د هرنايي ضلعې د مرستيال کمشنر وريندر لال په خبره حکومتي ذمه واره ادارې خپل کار کوي او چې د کولې په کومو کانونو کې ضروري اسانتياوې نه وي برابرې هغه بندوي او مالکان يې جرمانه کوي. د وربندر په خبره په تېرو څو مياشتو کې يې تر اوسه يواځې په هرنايي، خوست او شاهرګه کې 120 د کولې کانونه بند کړي دي.

  • 16x9 Image

    حفیظ الله شېرانی

    حفیظ الله ستوری شېرانی په بلوچستان کې د وي.او.اې ډیوه د خبریال په توګه کار کوي. هغه له بلوچستان پوهنتون څخه په جرنلزم او پښتو ادبیاتو کې ماسټرۍ کړې دي او له تېرو اوو کلونو راهیسې د جرنلزم په میدان کې کار کوي. شپږ کاله یې د پاکستان له (ډان) ټیلیویژن سره د خبریال په توګه کار کړی او په بېلابېلو ورځپاڼو کې یې کالمونه هم لیکلي دي. په بلوچستان کې د ډیوه رېډیو او ټیلویژن لپاره د ملټي مېډیا په برخه کې پر بېلابېلو سیاسي، کلتوري او ټولنیزو موضوعاتو رپوټونه جوړوي.

     

XS
SM
MD
LG