لاس رسیدونکی لینک

Breaking News

ملګري ملتونه: د برما سیاسي بندیان دې خوشي او تشدد دې ختم شي


واشنګټن ـــ د ملګرو ملتونو د امنیت شورا یو ځل بیا د میانمار یا برما پر پوځي چارواکو ږغ کړی چې د دې هېواد د مشرې آنګ سان سوچي او صدر وین میانټ په ګډون ټول بندیان دې خوشي کړي او روان تشدد دې ختم کړي.

امنیت شورا د پنجشنبې- زیارت په ورځ په خپل بیان کې په برما کې پر روانو خرابو امنیتي حالاتو سخته اندېښنه څرګنده کړې او هلته یې پر سوله ییزو احتجاج کوونکو د پوځ او پولیسو تشدد په کلکه غندلی دی.

په میانمار کې د پوځي کودتا په ضد د تېرو دوو میاشتو په احتجاجونو کې د پوځ او پولیسو په تشدد کې تر اوسه سلګونه عام خلک وژل شوي چې ښځې او ماشومان هم پکې شامل دي.

امنیت شورا د میانمار پر پوځ او ټولو اړخونو ږغ کړی چې له ډېر زغمه کار واخلي او له تشدده لاس واخلي.

د ملګرو ملتونو امنیت شورا په میانمار کې روانو حالاتو ته په اشارې یو ځل بیا د برما د خلکو خوښې او دلچسپۍ ته په پام ټینګار کړی، چې د بشري حقونو بشپړ درناوي او د خبرو او پخلاینې دوام ته اړتیا ده.

د میانمار د مشرې آنګ سانګ سوچي وکیل ویلي، پر هغې د پنجشنبې- زیارت په ورځ تور لګېدلی چې د دې هېواد پټ رازونه یې ښکاره کړي دي. دا د پوځ له خوا د فرورۍ د لومړۍ نېټې له کودتا وروسته پر هغې لګېدلي تر ټولو سنګین تورونه دي.

آنګ سان سوچي او صدر وین میانټ د میانمار د نېشنل لیګ فار ډیموکرېسي ګوند له نورو کسانو سره یو ځای په دې هېواد کې د کودتا په پیل کې نیول شوي دي. پر مېرمن سوچي تور دی چې د کورونا وایرس په اړه رازونه یې رسوا کړي او له ځان سره یې شپږ نارجسټر شوي واکي ټاکي ساتلي‌ وو.

د آنګ سان سوچي وکیل خین ماونګ زاو رایټرز خبري ایجنسۍ ته ویلي، مېرمن سوچي، د هغې د کابینې درې وزیران او د سین ټرنیل په نامه اسټرېلیایي اقتصادي سلاکار د برما د پټو رازونو د قانون په بنیاد تورن شوي دي.

وایي که پر دوی جرم ثابت شي نو د څورلس کاله بند سزا ورته اورول کېدای شي.

مېرمن سوچي د پنجشنبې- زیارت په ورځ د مقدمې د اورېدنې لپاره پر وېډیو را ښکاره شوه چې صحت یې ښه ښکارېده خو د دغو تورونو په اړه یې څه نه دي ویلي.

په برما کې د کودتا ضد احتجاج کوونکي د پنجشنبې- زیارت په ورځ یو ځل بیا سړکونو ته را ووتل او وروسته له هغه یې د دې هېواد د آیین پاڼې وسوځولې چې له پارلمانه ګوښه شویو وکیلانو په دې هېواد کې یو نوی ملکي حکومت اعلان کړ.

XS
SM
MD
LG