واشنګټن ـــ د امریکا خارجه چارو وزیر انتوني بلینکن ویلي په پاکستان کې په میډیا قدعنونه د اظهار د ازادۍ لپاره خطرناک دي.
ښاغلي بلنکن د صحافتي ازادۍ د نړیوالې ورځ په مناسبت انلاین غونډه کې په پاکستان کې پر مېډیا د لګول شوو څرګندو قدعنونو په حقله وینا کې دا خبره کړې ده.
د امریکا خارجه وزیر زیاته کړه مونږ د بشري حقونو په اړه راپورونو او د میډیا د لارې کتلي چې په پاکستان کې صحافیان او د هغوی کورنۍ اکثر د امنیتي ادارو، سیاسي ګوندونو، وسله والو او د نورو ډلو له خوا ځورول کیږي او ورته دهړکې ورکول کیږي.
د امریکا خارجه چارو وزیر انتوني بلنکن پخپله وینا کې وويل، امریکا په څو څو وارې په پاکستان کې د صحافتي ازادۍ پورې تړلې ستونځې او انديښنې د پاکستاني چارواکو سره په ناستو او بحثونو کې راپورته کړي دي.
ښاغلي بلنکن وویل له پاکستان سره په یو شمېر برخو کې په څرګندو ګډو مفاداتو باندې همکاري لري:
"فکر کوم پاکستان سره زمونږ څرګنده او په راستۍ هلوځلو مونږ ددې جوګه کړو چې د دوی سره د بشري حقونو په ستونځو پراخه او دوامداره خبرې وکړو بلخصوص په صحافتي او مذهبي ازادۍ او د قانون په بالادستۍ".
د پاکستان حکومت په هېواد کې په میډیا باندې د قدعنونو لګولو تورونه هر وار رد کړي دي.
د امریکا خارجه وزیر دا وینا په داسې وخت کې کړې چې په پاکستان کې فریډم نیټ ورک ګروپ پخپل کالني رپوټ کې ویلي، په پاکستان کې د کال 2020 مې له میاشتې نه تر اپریل 2021 پورې په میډیا او صحافیانو پورې تړلې 148 پیښې د حملو او سرغړونو رپوټ شوې دي.
په دغو کې 6 صحافیان وژل شوي او د صحافتي ذمه واریو پوره کولو په وخت د 7 صحافیانو د تښتولو ناکامه هڅې شوې، 5 صحافیان تښتول شوي، 25 نیول شوي، 15 ځورول شوي او د 27 پرضد مقدمې جوړې کړل شوي.
رپوټ وایي ریاست د صحافیانو پرضد تر ټولو لوی خطر جوړ شوی او اوس د بلوچستان او قبایلي ضلعو غوندې اسلام اباد هم د صحافیانو لپاره په ګرد پاکستان کې تر ټولو خطرناکه ځای جوړ شوی.
