امريکې په تيرو 30 ورځو کې د افغانستان په بېلا بيلو برخو کې د افغان امنيتي ځواکونو په ملاتړ په طالبانو بريدونه کړي دي.
د امريکې د دفاع وزارت چارواکي د زيارت/ پنجشنبې په ورځ وي او اې ته ويلي چې هوايي بريدونه زیاتره د ډرون د لارې شوي او طالبانو چې د افغانستان د دفاعي او امنيتي ځواکونو کوم پوځي سامانونه نيولي هغه پکې په نخښه کړی شوي دي.
چارواکي د نوم نه ښکاره کولو په شرط ويلي د دښمن ځواک او د دښمن جنګيالي په نخښه شوي دي.
د افغانستان د ځايي خلکو په وېنا د څو ورځو راهسې امریکايي ډرون ليدل کېده او ځینې راپورونه داسې هم دي چې په کندهار کې په طالبانو ډرون بريدونه شوي دي.
خو د امریکا چارواکو د دې ويلو نه ډډه کړې چې دوی د افغان ځواکونو مرسته د چرته نه کړې ده.
چارواکي ویلي د دوی په پاليسۍ کې هيڅ بدلون نه دی راغلی او زياته کړې يې ده تازه بريدونه د واشنګټن د سټراټیجۍ برخه ده.
د زيارت په ورځ د پېنټاګون پرېس سيکرټري جان کربي ويلي وو امریکې د افغان ځواکونو په ملاتړ په تيرو څو ورځو کې هوايي بريدونه کړي دي خو نور جزيات يې نه وو شريک کړي.
د پېنټاګون چارواکو د دې میاشتې په سر کې ويلي وو چې د سیمې دپاره د امریکا د مرکزي کمانډ جنرل کېنت مېککنزی واک لري چې څو پورې د افغانستان څخه د امریکايي ځواکونه په پوره توګه نه وي وتلي کولی شي چې د افغان ځواکونو د مرستې دپاره هوايي ځواک راوبلي.
په افغانستان کې د امریکايي ځواکونو لخوا د هوايي بريدونو خبر په داسې وخت کې مخې ته راغلی چې امریکا د افغانستان نه خپل ځواکونه اوباسي او ويل شوي د 31 اګست پورې به امريکا د ځواکونو ويستل پوره کړي.
دغه رنګ د امريکا اتحادي نېټو ځواکونو هم د وتلو ويلي دي.
د امریکايي ځواکونو د ويستلو سره په افغانستان کې طالبانو بریدونو ته زور ورکړی دی.
په عېن حال کې د امریکې د ګډو ځواکونو مشر جنرل مارک ميلی د شورو/ چهارشنبې په ورځ (21 جولايۍ) خبريالانو سره په خبرو کې ويلي چې د افغانستان په ولسوالیو/ ضلعو د نيمې پورې چې نزدې 212 جوړيږي مرکزونه يې د طالبانو په لاس کې دي.
ميلی ويلي، سټراټیجیک حالات ښکاري د طالبانو په ګټه دي.
نوموړي زياته کړې "دوی (طالبان) هڅه کوي چې د غټې ابادۍ مرکزونه جدا کړي، او دوی دغه ډول د کابل سره هم کول غواړي او دوی ډېر علاقه نيولې ده.
خو بل لور ته بيا افغان چارواکي دعوه کوي چې په ډېرو ځايونو کې ولسوالۍ بيرته هم نیولي دي.