لاس رسیدونکی لینک

Breaking News

طالبانو د کندهار په هوايي اډه بريد کړی


د افغانستان په جنوبي ولايت کندهار کې طالبانو په هوايي اډه راکټې داغلي چې له امله يې د کندهار په هوايي اډه د الوتکو تګ راتګ ودرول شوی دی.

چارواکو ويلي د طالبان او حکومتي ځواکونو ترمنځ د په کندهار او ورسره څنګ ته د هلمند په مرکز لشکرګاه کې د نښتو په مهال د کندهار هوايي اډه په نخښه شوې ده.

ويل شوي دغه پېښه د خالي/شنبې او اتوار/يکشنبې په شپه رامنځته شوې ده.

چارواکو ويلي څو راکټې په هوايي اډه کې لګېدلي، رن وی يا د الوتکو پورته کېدو کوزېدو ليکه يې خرابه کړې او د سمېدو پورې به يې ټول پروازونه بند وي.

د طالبانو وياند ذبيح الله مجاهد وي او اې ته ويلي د کندهار هوايي اډه يې په نخښه کړې او رن وی يې خرابه کړې ده.

هغه ويلي د دغه هوايي اډې څخه به جنګي الوتکې پورته کېدې په مونږ (طالبانو) او ملکي وګړو به يې هوايي بريدونه کول، او په هلمند کې يې هسپتال په نخښه کړی دی.

د هلمند په لشکرګاه کې يو شخصي روغتون باندې بمباري شوې چې پکې تن وژل شوی دی.

د روغتون مالک ډاکټر محمد دين د خالي/شنبې په ورځ ویلي، افغان ځواکونو په غلطۍ سره روغتون ويشتی وو ځکه دوی ګڼل چې دغلته د طالبانو درملنه کيږي.

راپورونه وايي د هلمند زياتره ولسوالۍ د طالبانو په لاس کې دي.

په افغانستان کې د لومړۍ څخه چې امریکا او نړيوالو ځواکونه وتل پېل کړي طالبانو بریدونو ته زور ورکړی دی.

افغان حکومت او طالبان په خپل خپل ځای د ولسواليو نيولو او يو بل ته د تلفاتو يا زيان اړولو دعوې کوي خو د حکومتي ځواکونو او طالبانو ترمنځ د جګړو په اړه د ازادو سرچينو څخه د دغو ادعاوو تاييد نه کيږي.

XS
SM
MD
LG