لاس رسیدونکی لینک

Breaking News

راشد خان: د نړۍ مشرانو موږ په ناورین کې مه پرېږدئ


واشنګټن ـــ تکړه کرکټر لوبغاړی او د افغانستان د ملي لوبډلې کېپټن راشد خان هم د خپل هېواد روانو خرابو امنیتي حالاتو اندېښمن کړی او له نړیوالو یې غوښتي چې افغانستان دې په ناروین کې نه پرېږدي.

د افغانستان د کرکټ د ملي لوبډلې کېپټن د راشد خان فاونډېشن او د افغان کرکټ اسوسیېشن له خوا د بیړنیو آنلاین مرستو غوښتنه هم کړې ده چې وایي مقصد یې په کندوز، هلمند، تخار او نورو ولایتونو کې د جګړې له کبله له بې کوره شویو او اغېزمنو سره مالي مرستې کول دي.

راشد خان نن پر خپله فېسبوک پاڼه په پښتو، دري او انګرېزي ژبو او په ټویټر یواځې په انګرېزي ژبه لیکلي چې خلک یې سوله غواړي او غوښتنه یې کړې چې جګړه دې بنده شي:

"زما ګران هېواد افغانستان له یو لوی ناورین سره مخامخ دی. هره ورځ سلګونه بې ګناه افغانان چې ښځې او ماشومان هم په کې دي شهیدان کیږي. کورونه، ښوونځي، دفترونه او نور ملي او عامه تاسیسات ویجاړېږي او زرګونه کورنۍ بې کوره او در په دره شوي دي".

راشد خان د چا له نوم اخیستلو پرته ویلي، "د افغانانو وژل او د افغانستان ورانول بند کړئ"، نوموړي له نړیوالو غوښتي "لطفآ له موږ سره مرسته وکړئ چې له دغه ناورین څخه ووځو، موږ په ناورین کې مه پرېږدئ".

راشد خان دا پیغام په داسې وخت کې خپور کړی چې طالبانو په افغانستان کې جګړه تېزه کړې او تر شاوخوا دوه سوه ولسوالیو نیولو وروسته یې اوس د پینځو ولایتونو د مرکزونو د نیولو دعوه کړې ده.

راشد خان پر ټویټر او فېسبوک په میلینونو مینه وال او فالوورز لري او په افغانستان کې د هغه د سولې پیغام ته ګڼو خلکو مثبت جواب ویلی او د هغه په هېواد کې یې د جګړې درېدل او سوله غوښتې ده.

د افغانستان د مدني ټولنې او د ښځو د حقونو د فعالینو تر څنګ لوبغاړي هم روانې جګړې اندېښمن کړي دي او وایي په تېرو شلو کلونو کې د کرکټ او فوټبال تر څنګ یې په نورو لوبو کې هم پرمختګ کړی او د افغانستان نوم یې په نړۍ کې ځلولی دی.

XS
SM
MD
LG