د پاکستان په بلوچستان صوبه کې د پوځ په یو ګاډي چاودنه شوې چې پکې يو پوځي افسر وژل شوی او دوه سرتيري ټپيان شوي دي.
د پاکستان پوځ نن د اتوار/يکشنبې په ورځ 22 اګست ویلي، د بلوچستان صوبې په ګيچک علاقه کې د امنيتي سرتيرو په ګاډي ښخ کړی شوی بم چاودل شوی دی.
په چاودنه کې کېپټن کاشف وژل شوی او دوه سرتيري ټپيان شوي او ټپيان د خضدار روغتون ته منتقل کړی شوي دي.
په سمدستي ډول د دې بريد زمه واري چا نه ده منلې.
بلوچستان کې دا تازه پېښه په داسې حال کې شوې چې د جمعې په ورځ 20 اګست د بلوچستان صوبې په ګوادر کې د چينايانو په يو کاروان بمي بريد شوی چې پکې دوه ماشومان وژل شوي او د يو چينايي په ګډون پکې څو نور ژوبل شوي وو.
وروسته ويل شوي په ژوبلو کې يو بل تن هم ژوند د لاسه ورکړی وو.
چين د يادې پېښې وروسته د پاکستان نه غوښتنه کړې چې د ګوادر په پروني بريد کې ککړ کسان دې مالوم کړي او سخته سزا دې ورته ورکړي، او پاکستان دې د امنيت دپاره کلک ګامونه پورته کړي چې نورې داسې پېښې ونه شي.
