په پېښور کې د امریکا نوي کونسل جنرل رچرډ رايلی پښتنو ته په پښتو کې پېغام ورکړی، وايي د هغه دپاره د خوشالۍ خبره ده چې دې ښکلې منطقې ته يو ځل بيا د کار کولو دپاره راغلی دی.
نوموړي په يو ويډيوي پېغام کې ويلي، غواړي چې د خېبرپښتونخوا د تاريخ او کلتور نه ځان خبر کړي، هغه ويلي د هغه دپاره د وياړ خبره ده چې په خېبرپښتونخوا کې د امریکايي اولس نمايندګي کوي.
رچرډ رايلی ويلي هغه په دې خبره باور لري چې امریکا او پاکستان ګڼ شريک اهداف لري چې پکې د کرونا وبا (کوېډـ 19) خلاف مبارزه، چې پکې امریکايي اولس پاکستان ته د 15 ملينه نه زيات د کرونا ويکسين ويړيا ورکړي دي او تمه لري چې دغه د ژوند بچ کولو ويکسين هر پاکستاني ته ترلاسه شي او په شريکه دا وبا ختمه کړی شي.
امریکايي کونسل جنرل زياته کړې خپل پام به د چاپيريال د بحران د مخنيوي په شان مهمې مسلې، د بشري حقونو مرستې، په خېبرپښتونخوا کې د ثبات، امنیت او سوکالۍ پله ګرځوي.
هغه ویلي د پاکستان د حکومت سره به د ترقۍ او پرمختيا په پروژو کار کوي، کوموته چې د يو اېس اې ايي ډي او امریکا سفارتي ماموریت د نورو برخو څخه ورته فنډونه ورکړی کيږي.
نوموړي زياته کړې د دغو پروژو د لارې به په خېبرپښتونخوا او په ځانګړي ډول په صوبه کې نوو شاملو شوو قبايلي ضلعو کې د خلکو په ژوند کې د بدلون دپاره په شريکه خپله همکاري جاري ساتي.
هغه تمه څرګنده کړې چې د خېبرپښتونخوا په دغه سفر کې به د ډېرو خلکو سره وويني، او خلکو ته يې پېغام ورکړی چې د دوی سره د ټولنيزو رسنيو د لارې په تماس کې اوسي، د يو بل سره بحثونه وکړي او د يو بل نه زده کړې وکړي.
