لاس رسیدونکی لینک

تازه خبر

باجوړ: د محمد الياس د وژنې زمه واري داعش خراسان منلې


د ګل په ورځ د خېبرپښتونخوا په قبايلي ضلع باجوړ کې په ډزو د وژل شوي محمد الياس د وژنې زمه واري داعش خراسان ډلې منلې ده.

محمد الياس چې د جمعيت علمااسلام ف ګوند د بلدياتي ټاکنو امېدوار وو، په 22 نومبر نامالومو وسله والو د امتحاني هال نه بهر په ډزو وژلی وو.

داعش خراسان ډلې مطبوعاتو ته ويلي، محمد الياس د پاکستان د استخباراتو وفادار وو ځکه يې په نخښه کړی دی.

د الياس د وژلو د پېښې وروسته د هغه کورنۍ او د باجوړ قومونو او سياسي خلکو احتجاجي پرلت پېل کړی او د هغه په وژنه کې د ککړو کسانو د نيولو غوښتنه يې کوله.

دغه احتجاجي پرلت چې ښځو هم پکې ګډون درلود، پرون د نهې/ سه شنبې په ورځ د باجوړ انتظاميې د باور ورکولو وروسته ختم کړی شوی دی.

د باجوړ پوليسو ويلي د پېښې پلټنې يې پېل کړي او ځينې مشکوک کسان هم نيول شوي دي.

د باجوړ ښار د جمعيت علمااسلام مشرانو ویلي وو چې محمد الياس ته د داعش لخوا د مرګ دړکې ورکړل کېدې.

داعش په وروستيو کې په خېبرپښتونخوا او بلوچستان صوبو کې د څو بریدونو زمه وارۍ منلي چې پکې په امنیتي ځواکونو د بريدونو سره د لږکيو غړي هم په نخښه کړی شوي دي.

په پېښور کې خبريال مشتاق يوسفزی وايي، چې د داعش د بريدونو سېوا کېدل ښايي چې دا ډله دلته نوره فعاله شوې ده، او د بريدونو خطر يې هم زیات شوی دی.

وي او اې ډیوه سره په خبرو کې هغه وويل، چې په افغانستان کې د طالبانو د راتلو وروسته هلته هم د داعش بريدونه سېوا شوي او ویل کيږي هاغه خلک چې په افغانستان کې د طالبانو نه جدا شوي او ځینې حکومتي امنيتي سرتيري هم په داعش کې شامل شوي دي، دغه رنګ په پاکستان کې هم د تحریک طالبان پاکستان د پاکستان د حکومت سره د خبرو نه ناخوښه جنګيالي يا سخت دريځه طالبان داعش ته د تلو امکان لري.

هغه زياته کړه، چې په راتلونکې کې د داعش خراسان د پياوړې کېدو اندېښنې هم شتون لري.

په پاکستان کې څيړونکي وايي په افغانستان کې د طالبانو په واک کې د راتلو وروسته داعش فعاليتونه سېوا کړي او په پاکستان کې هم د داعش سېوا کېدو اندېښنې څرګنديږي.

خو پاکستان تل دعوه کړې چې داعش په پاکستان کې په منظم ډول شتون نه لري خو بل لور ته داعش دلته وخت په وخت د بريدونو زمه وارۍ منلي او د پاکستان امنیتي ادارې او پوليس هم بيا وخت په وخت دعوې کوي چې د داعش ترهګر يې وژلي او نيولي هم دي.

په افغانستان کې د طالبانو په واک کې د راتلو وروسته د پاکستان د کورنیو چارو وزير شېخ رشید هم ویلي وو چې داعش د پاکستان سره په پوله پرته د افغانستان په ختيځه ننګرهار صوبه کې شتون لري.

داعش چې په افغانستان کې فعالیتونه لرل، د کال 2020 په نيمايۍ کې امریکې او طالبانو دغه ډله په شا تمبولې وه خو د روان کال اګست په مياشت کې د امريکا د افغانستان څخه وتلو وروسته دا ډله بیرته فعاله شوې ده.

په عېن حال کې د امريکې د بهرنیو چارو وزارت د ګل/ دوشنبې په ورځ (22 نومبر) د داعش خراسان يو لوړ پوړی مشر ثنا الله غفاري، سلطان عزيز اعظم او مولوي رجب ځانګړي نړيوال ترهګر ګرځولي دي.

تيره اوونۍ په افغانستان کې د ملګرو ملتونو لوړ پوړې استازې ويلي وو داسې ښکاري داعش به ډېر زر د افغانستان په ټولو صوبو کې فعالیتونه ولري.

د امريکايي چارواکو د شمېرو ترمخه داعش په افغانستان کې د 2000 پورې سخت دریځه جنګیالي لري.

خو په افغانستان کې د طالبانو د راتګ سره چې هلته زندانونه خالي کړی شوي وو ويل شوي د داعش جنګيالي ورسره په ټول ملک کې سېوا شوي دي.

د ترهګرۍ ضد نړيوالو چارواکو او کار پوهانو هم داسې اندېښنې راپورته کړې چې داعش خراسان ته بهرني جنګيالي راشي او په دوی کې شامل شي.

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG