واشنګټن ـــ د طالبانو حکومت په بهر کې د افغانستان له کنګل شوې شتمنۍ نه د 280 میلینه ډالرو د ازادېدو هرکلی کړی او دا یې د ستونځې د حل دپاره د یوې لارې پرانیستل کېدل بللي او وایي د نورو منجمد پیسو ازادېدو ته به لار جوړه کړي.
د طالبانو د حکومت د مالیې وزارت د نړیوال بېنک پرېکړه ستایلې، خو دا اقدامات یې په دوحه کې د طالبانو او امریکايي پلاوي تر منځ د وروستیو دوه ورځنیو بحثونو نتیجه بللې. د دې وزارت ویاند احمد ولي حقمل وي او اې ته وویل دا اقدمات به په راتلونکي کې د نورو کنګل شوو پیسو خوشې کېدو ته هم لار پرانیزي:
"د افغانستان دولت سره مرسته شوې وه خو د دې تحولاتو وروسته نړیوال بانک هم هغه پیسې کنګل کړې او اوس پس له ډېره وخته په دې توانیږو چې د هغو پیسو څخه دوه سوه اتیا میلین ډالر راځي د بشردوستانه مرستو لپاره دا یو ښه ګام دی".
نړیوال بېنک منلې چې د ژمي په یخ موسم کې د افغانستان تر نیمایي د زیاتې ابادۍ د خوراک له کمي سره د مخ کېدو د اندېښنې له کبله نړیوالو مرستندویه ادارو افغانستان ته د ۲۸ کروړو ډالرو پر ورکولو رضا شوې دي.
نړیوال بېنک د جمعې په ورځ پخپل بیان کې ویلي وو چې د افغانستان د بیارغونې د فنډ یا اې آر ټي ایف دا پانګې به په دې بحراني حالت کې د افغان ولس د ژوند په ښه کولو مرسته وکړي.
فرانس پریس خبري ایجنسۍ پخپل رپورټ کې ویلي چې د نړیوال بېنک ازادې شوې پیسې به د ماشومانو لپاره د ملګرو ملتونو ادارې یونیسیف او د خوراک نړیوالې ادارې ته په افغانستان کې د بشري بحران د مخنیوي لپاره ورکول کېږي.
ټاکل شوې 180 میلینه ډالر ازادې شوې پیسې د خوړو نړیوال پروګرام ته ورکړل شي چې د خوړو پر خوندیتوب او د خوارځواکۍ پر مخنیوي به یې لګوي. سل میلینه ډالر به یونیسیف ته ورکول کېږي چې د ماشومانو د بنیادي روغتیایي اسانتیاوو په برخه کې یې ولګوي.
د افغانستان د تجارت او سرمایه کارۍ چېمبر هم د افغانستان د 280 میلین ډالرو د ازادېدو او د امریکې د مالیې وزارت له خوا له بهره په افغانستان کې دننه خلکو ته د بېنکونو له لارې د شخصي پیسو د لېږلو د اجازې پریکړې ستایلې دي. د دې چېمبر مرستیال مشر خان جان الکوزی وایي:
"هیله مو داده چې نورې پیسې هم ازادې شي. زه فکر کوم د دې تاثیرات د افغانستان په اقتصاد باندې مثبت دي، شخصي اکاونټونو ته د پیسو لیږل رالیږل دا به په اقتصاد ځکه تاثیر وکړي چې دولتي پیسې نه دي".
د طالبانو د مالیې وزارت ویاند احمد ولي حقمل وایي دا مهمه نه ده چې نړیوال بېنک د افغانستان له کنګل شویو پیسو څخه څومره ازادې کړې دي، بلکې مهم کار د لارې پرانیستل کېدل دي چې وایي کیدای شي په راتلونکي کې د نورو پیسو د ازادېدو سبب شي.
د امریکې حکومت د اګست په 15 مه کابل ته د طالبانو تر ننوتلو یوه ورځ وروسته د افغانستان بېنک شاوخوا نهه نیم اربه ډالره شتمني کنګل کړه او د طالبانو حکومت ته له سپارلو یې انکار وکړ چې له کبله یې د افغانستان بېنکي سیسټم له زوال سره مخ شو.
طالبانو په وروستیو کې د امریکې له کانګرس او حکومته غوښتنه کړې وه چې د افغانستان کنګل کړې پیسې ازادې کړي، امریکایي چارواکو یې دا غوښتنه رد کړې وه خو ویلي یې وو له افغانستان به بشري مرستې روانې ساتي.