لاس رسیدونکی لینک

Breaking News

پاکستان: د موسمياتو محمکې بيا د بارانونو او واورې د ورښت سره د غرونو ښوېدو د خطرې خبر ورکړی


په پاکستان کې د موسمياتو محکمې په روانه اوونۍ کې د خېبرپښتونخوا په برنو غرييزو سيمو او بلوچستان په ځينو برخو کې د واورې د ورښت سره د غرونو ښوېدو د خطرې خبر ورکړی دی.

د دې ترڅنګ د اسلام اباد او پنجاب په ځينو مېداني سيمو کې د بارانونو ورېدو امکان هم څرګند کړی شوی دی.

د موسمياتو محمکې د نهې/ سه شنبې او شورو/ چهارشنبې په ورځ په کوټه، زیارت، پشين، ژوب، قلعه عبدالله، کوهلو اور بارکان کې د باران او واورې کېدو وړاندوېنه کړې ده.

د نهې نه تر زيارت/ پنجشنبې پورې د خېبرپښتونخوا په شمالي غريیزو سيمو، کشمير او ګلت پورې د واورې ورېدو او په مېداني علاقونو کې د نري باران کېدو ويل شوي دي.

دغه رنګ د نهې نه تر زيارت د ورځې پورې په مري، ګليات، نتهياګلۍ، کاغان ناران، چترال، دير، سوات، کوهستان او ګلګت کې د منځنۍ درجې د واورې ورېدو امکان څرګند کړی شوی دی.

د موسمياتو محکمې ويلي دا بارانونه د غنمو د فصل دپاره ګټور ګرځېدی شي خو ورسره ويل شوي، د نهې او شورو په ورځو کې په دير، ملاکنډ، هزاره او سوات سره په کوهستان او ګلګت، کشمير کې د غرونو يا ځمکو ښوېدو خطره هم شتون لري.

محکمې اړونده ادارو ته د چمتو پاتې کېدو لارښوونه کړې ده.

د پاکستان د موسمياتو محکمې په ملک کې د بارانونو او واورې د ورښت خبر په داسې حال کې ورکړی چې په وروستیو کې د پلازمينې اسلام اباد سره نزدې د سېلګرۍ په سيمه مري کې په واورو کې د لسګونو په شمېره کې سېلانيان ګېر شوي او د 22 پورې کسان پکې مړه شوي هم وو.

په پاکستان کې پوهان وايي په ملک کې په کال 2005 کې د راغلې زورورې زلزلې وروسته د مرکز او صوبو په کچه د قدرتي افتونو په وخت د مرستو دپاره ادارې جوړې شوي خو د ضلعو او په ځايي کچه بيا تکړه نظام شتون نه لري.

دغه خبره په پېښور پوهنتون کې د قدرتي افتونو د انتظام د څانګې استاز مشتاق احمد خان د وي او اې ډيوه خبريال عثمان خان سره په خبرو کې کړې ده.

نوموړي ویلي د پوهنتون ياده څانګه په صوبه کې د قدرتي افتونو په وخت د انتظام ادارې (پي ډي اېم ای) دپاره مددګار موبايل اېپ هم جوړوي کوم چې به د قدرتي افتونو په وخت د عامو خلکو او ادارې دپاره ګټور وګرځي.

د موسمياتو محکمه وايي په ورځ کې دوه ځله د موسم په اړه مالومات د اړوتده ادارو سره شريکوي، او د کار پوهانو په وېنا پکار ده چې خلک هم د ځان د موسم په حال خبر ساتي، په ځانګړي ډول د واورو د ورښت علاقو ته د تلو په وخت د ځان ساتنې پوره انتظام کوي.

د موسمياتو او قدرتي افتونو د کار پوهانو په خبره پاکستان د نړۍ په هغو هېوادونو کې شامل دی کوم چې د موسمي بدلون د اغېزو لاندې دي.

د پوهانو په وېنا په ملک کې په راتلونکې کې د سېلابونو، طوفانونو راتلو سره، وچکالي او تودوخې کچه لوړېده امکان لري ځکه پکار ده چې اړونده ملکي ادارې پياوړې کړی شي او په موجود نظام کې نيمګړتياوې ختمې کړی شي.

XS
SM
MD
LG