لاس رسیدونکی لینک

Breaking News

چمن:بمي برید کې دعسکرو په ګډون شپږ تنه ژوبل،پوځ وایي درې ترهګر یې وژلي


د پاکستان پوځ ویلي په بلوچستان صوبه کې يې عمليات کړي او د درېو ترهګرو د وژلو دعوه يې کړې ده، بل لور ته د افغانستان سره پولې ته نزدې په چمن سيمه کې د لاسي بم برید شوی او د ليويز ځواک د دوه سرتيرو په ګډون پکې شپږ تنه ژوبل شوي دي.

د پاکستان سرکاري ميډيا د پوځ له قوله ويلي، چې د بلوچستان په کېچ ضلع کې عمليات ترسره کړي شوي دي.

ويل شوي دغه عمليات په پنجګور ضلع کې د تازه ترهګرو بريدونو وروسته د پاکۍ د عملياتو په لړ کې ترسره شوي دي.

د بلوچستان صوبې په پنجګور او نوشکي سيمه کې په دوېمه فرورۍ ناوخته د اېف ـ سې / ملېشې ځواک په دوه کېمپونو وسله وال بريدونه شوي، او د راپورونو ترمخه د پرون جمعې د ماښام (4 جنورۍ) پورې هلته دغه عمليات روان وو.

د پاکستان پوځ او د بلوچستان حکومت د دغو بريدونو او وسله والو سره په نښته کې د 13 ترهګرو او اووه سرتيرو د وژلو خبر تاييد کړی دی.

په پنجګور او نوشکي کې د دغو دواړو بریدونو ذمه واري د بلوچستان لیبرېشن آرمي (بي ایل اې) په نامه د ازادي غوښتونکو بلوڅانو یوه تنظیم پر غاړه اخیستې دي.

پوځ ويلي، په کېچ کې ترسره کړو عملياتو کې يې د دوه مهمو اهدافو په ګډون درې ترهګر وژلي دي.

ويل شوي د استخباراتي مالوماتو په اساس عمليات شوي او بيا د ترهګرو سره نښته شوې ده. په سرکاري خبر کې زياته کړی شوې چې وژل شوي ترهګر په بلوچستان کې په ترهګرو بريدونو کې ککړ وو او د دوی د ولقې نه په غټه کچه وسله ترلاسه شوې ده.

بل لور ته چارواکو ويلي، د افغانستان سره په پوله د بلوچستان په چمن سيمه کې د لاسي بم بريد شوی او د چمن د مرستیال کمشنرد دفتر څخه په جاري شوي خبر کې ويل شوي چې په پېښه کې د دوه ليویز سرتيرو په ګډون شپږ تنه ژوبل شوي دي.

په سمدستي ډول د دغه بريد زمه واري چا نه ده منلې.

د چمن د مرستيال کمشنر جمه داد خان مندوخېل د دفتر په بيان کې ويل شوي، چې ماښام په اووه نيمې بجې نامالومو شرخوښو په چمن کراس د ليويز په تاڼه لاسي بم/ ګرنېډ ويشتی دی.

ويل شوي د بريد وروسته امنيتي ځواکونو د پلټنې عمليات پېل کړي او سي ټي ډي د پېښې مقدمه درج کړې ده.

له دې وړاندې په 27 جنورۍ هم په چمن کې د ليويز ځواک يو حوالدار د نامالومه وسله والو په بريد کې وژل شوی وو. تحریک طالبان پاکستان د دغه بريد زمه واري منلې وه.

په افغانستان کې د طالبانو په واک کې د راتلو وروسته د پاکستان په خېبرپښتونخوا، قبايلي ضلعو او بلوچستان صوبه کې په امنيتي ځواکونو بريدونه سېوا شوي دي.

په دغو بريدونو کې زیاتره په خېببرپښتونخوا او قبايلي ضلعو کې ترسره شوي او د زیاترو زمه وارۍ لاقانونه ګرځول شوې ډلې تحريک طالبان منلي دي.

XS
SM
MD
LG