په اوکراين کې د ګل/ دوشنبې په ورځ د امریکايي خبري ادارې فاکس نيوز کېمرا مېن پيرې زېکرزیوسکي او اوليکسنډرا کوشنوا د جګړې د کورېج په مهال وژل شوي دي، او د فاکس نيوز خبريال بېنجمن هېل سخت ژوبل شوی دی.
امریکايي خبري ادارې د نهې په ورځ په اوکراين کې د خپل کېمرامېن زېکرزیوسکي د وژنې خبر ورکړی دی، او 24 کلن اوکراينی صحافي کوشنوا هم په بريد کې وژل شوی دی.
ويل شوي زېکرزیوسکي 55 کلن وو، او هغه د فاکس نيوز د خبريال بېنجمن سره هغه وخت ژوبل شوی وو چې کله د دوی په ګاډي د کيف سره نزدې په هورنيکا کې ډزې شوې وې.
د اوکراين د کورنيو چارو سلاکار اېنټن جیراشيچينکو ويلي، د دغو دواړو صحافيانو سره د اوکراين صحافي کوشنوا هم په ګاډي کې وو او هغه هم په ډزو کې وژل شوی دی.
بېنجمن هېل د فاکس نيوز لخوا د امریکا د بهرنيو د وزارت دپاره خبريال وو، هغه ژوبل دی او درملنه يې روانه ده.
هېل او زېکرزیوسکي دواړه تجربه کاره صحافيان وو، په افغانستان، عراق او شام کې يې د جګړو کورېج کړی وو.
فاکس نيوز ویلي زېکرزیوسکي ډېره تجربه لرله، او هغه يې ستايلی دی.
د سپينې ماڼۍ ویاند سېکرټري جېن ساکي زېکرزیوسکي ته د عقیدت پيرزونې وړاندې کړي دي.
ويل کيږي په اوکراين کې د روس په جګړه کې خبریالانو ته کار نور ګرانيږي.
له دې وړاندې اېوارډ اخستونکی امریکايي فلم جوړونکی برېنټ رينوډ د اتوار په ورځ وژل شوی وو.
په لومړي مارچ يو اوکرایني کېمرا مېن يويهني ساکون په کيف کې کار کوونکي د (لايو ټي وي) کی ټي وي په ټاور د روس په حمله کې وژل شوی وو.
له دې نه علاوه څو خبري ادارو هم ویلي، چې په عمله کې په اوکراين کې د کورېج په مهال بريدونه شوي دي.
په وینا کې نړيوالې ادارې پرېس انسټيټيوټ په يو بيان کې غوښتي، چې د ميډيا د کورېج په مهال دې په صحافیانو تشدد ودرول شي، او په اوکراين کې دې صحافيان ونه وژل شي.
