امريکې د پاکستان د وزيراعظم عمران خان دغه تور رد کړی چې امریکا د عمران خان د حکومت پرضد ده او د څوکۍ نه لرې کولو سازش یې کوي.
د امریکې سپينې ماڼۍ او د بهرنيو چارو وزارت دواړو ويلي، دغه تور رښتيا نه دی.
د پاکستان وزيراعظم عمران خان تيره شپه په 31 مارچ قوم ته په ټيلي ويژن وېنا کې د هغه خط يادګېرنه وکړه، د کوم په اړه چې نوموړي د (27مارچ) په ماښام په اسلام اباد کې د خپل ګوند د پلويانو راجوړې غټې غونډې ته په وېنا کې کړې وه.
عمران خان ويلي وو، د هغه د حکومت پرضد د بهرني سازش ډېرې خبرې به په مناسب وخت مخې ته راوړي.
تېره شپه په خپله وېنا کې عمران خان د ياد خط د خبرې کولو په وخت وويل، "مونږ ته په اتم يا د هغې نه وړاندې په اووم مارچ مونږ ته د امریکې نه، د امریکې نه نه، د بهرني يو ملک نه، مطلب د بهر يو ملک نه پېغام راځي".
هغه وويل دغه پېغام د وزیراعظم پرضد دی خو دا د قوم پرضد دی. هغه زياته کړه "په دغه پېغام کې ښکاره ويل شوي دي، او هغو ته د وړاندې نه مالومه وه چې اپوزيشن د عدم اعتماد تحریک راوړي، د دې مطلب دا دی چې د وړاندې نه د دوی د بهر خلکو سره رابطې وې، او په دې کې د خوند خبره دا ده چې دوی د پاکستان د مشرتابه يا د حکومت پرضد نه دی يواځې د عمران خان دپاره دي".
عمران خان دا هم وويل، د هغه پرضد دغه بهانه جوړه شوې چې پاکستان ته ځکه غصه دي چې که عمران خان د واک نه لاړ شي نو د امريکې غصه به سړه شي، او که عمران خان لاړ نه شي نو پاکستان به د مشکلاتو سره مخ شي.
عمران خان زياته کړه، وجه دغه ښودل شوې چې عمران خان يواځې روس ته د تلو فېصله کړې خو نوموړي وويل، روس ته د هغه د تګ په اړه د بهرنيو چارو وزارت او پوځي مشرتابه سره مشوره شوې وه.
د عمران خان د دغه وېنا وروسته د امريکې سپينې ماڼۍ او بهرنیو چارو وزارت دواړو د عمران خان تور رد کړی دی.
د سپينې ماڼۍ وياندې کېټ بيډنګفيلډ نه پوښتنه شوې چې د پاکستان وزیراعظم په امریکا تور لګولی چې امریکا د هغه (عمران خان) د مخالفين سره په ګډه هغه د واک نه لرې کول غواړي، سپينه ماڼۍ پرې څه وايي؟
هغې په ځواب کې دومره ویلي، "دغه تور هيڅ حقیقت نه لري".
او د امريکې د بهرنيو چارو د وزارت د وياند نېډ پرايس هم دغه پوښتنه شوې او هغه هم ورته ځواب کړی چې،
"مونږ په پاکستان کې پرمختګونه د نزدې نه څارو، مونږ ورته احترام لرو، مونږ د پاکستان د اييني عمل او قانون د عملدارۍ ملاتړ کوو. خو که دغو تورونو خبره کوو، دا حقيقت نه لري".
بل لور ته د پاکستان د بهرنيو چارو وزير شاه محمود قرېشي د ياد خط په اړه ويلي، "چې څه شوي هغه مناسب نه وو، کومې خبرې چې زما د نظر نه تېر شوی هغه مناسب نه وو، وزيراعظم مې پرې خبر کړو".
د پاکستان سرکاري ټيلي ويژن سره نن د جمعې په ورځ (لومړي اپرېل) خبرو کې وويل، "چې پرون د ملي امنيت غونډه شوې او په دغه غونډه کې فېصله شوې چې په دغه اړه خپل پاليسي بيان امريکا ته ورسوي او بيا د ملي امنيت د غونډې په پرېکړه د شپې په مهال په پاکستان کې د امریکا استازي ته او په واشنګټن کې د پاکستان د سفير د لارې دغه پېغام ورکړی شوی دی".
امريکې تراوسه پورې په دغه اړوند کوم رسمي غبرګون نه دی ورکړی.
