واشنګټن ــــ د ملګرو ملتونو سیکرټري جنرل انتونیو ګوتېریش یو ځل بیا په افغانستان کې تر شپږم ټولګي پورته د نجونو د سکولونو د بندېدو په اړه اندېښنه ښودلې او د طالبانو د حکومت دا پرېکړه یې د دې هیواد په زیان بللې ده.
انتونیو ګوتېریش د اپرېل په دویمه پر خپله ټویټر پاڼه لیکلي چې د نجونو پر تعلیم بندیز له بشري حقوقو بې جوازه سرغړونه ده. ښاغلی ګوتېریش وایي:
"زه ډېر خفه یم چې تر شپږم پورته د نجونو ټولګي ځنډول شوي دي، دا له برابرو حقوقو ښکاره سرغړونه ده چې هیڅ جواز نه لري او دا د ټول هیواد په زیان ده."
د ملګرو ملتونو عمومي مشر ویلي د افغانو ښځو او نجونو د حقونو ملاتړ کولای شي چې د دې هېواد ماشومان له لوږې او ټولنه یې له غریبۍ و ژغوري.
د طالبانو د تعلیم وزارت د نوي تعلیمي کال په لومړۍ ورځ د نجونو او هلکانو سکولونه پرانیستل، خو په هماغه لومړۍ ورځ یې څو ګنټې وروسته په یوه اعلامیه کې وویل چې د نجونو تر شپږم پورته ټولګي به تر بل امر پورې بند وي.
د طالبانو له خوا تر شپږم پورته د نجونو پر تعلیم د بندیز په ضد په نړۍ کې پراخ غبرګونونه را وپارېدل.
تېره اوونۍ امریکې، کېنېډا، فرانس، ایټلي، ناروې او برتانیې په یوه ګډه اعلامیه کې د طالبانو دغه اقدام غندلی وو او د طالبانو له حکومت يې غوښتي وو چې خپله پرېکړه بیرته واخلي او د نجونو سکولونه سمدستي بیرته پرانیزي.
له دې پرته ایمنیسټي انټرنېشنل، د بشري حقونو د څار نړیوالې ادارې او ملګرو ملتونو هم پرله پسې د طالبانو له خوا د نجونو پر لوړو زدکړو د بندیز په اړه ژوره اندېښنه څرګنده کړې ده.
د بخښنې نړیوال سازمان یا ایمنیسټي انټرنېشنل پخپل تازه رپوټ کې ویلي چې پر افغانستان د طالبانو تر واکمنۍ وروسته ښځې او نجونې له ټولو برخو په ځانګړي ډول د تعلیم او په سرکاري ادارو کې له کار او رسنیو لرې شوې دي.
دغه اداره وایي مخکې په افغانستان کې 36 فیصده د رسنیو کارکوونکې، 28 فیصده د پارلمان غړې، والیان یا د واليانو مرستیالې ښځې وې، خو وايي د طالبانو تر راتګ وروسته هغوی ټولې له دغو برخو لرې کړل شوې دي.
