د اوکراين وزیراعظم د اتوار/ يکشنبې په ورځ ويلي، چې سټراټيجیکي ساحلي ښار ماريوپول يې لا په کنټرول کې دی.
وزيراعظم ډينس شمېهل د امریکا (اې بي سي) خبري ادارې ته ویلي، ماريوپل ښار سقوط شوی نه دی، د اوکراين په لاس کې دی.
هغه دغه بيان وروسته له هغې ورکړی چې روس په دغه ښار کې جنګيالو ته ويلي وو چې وسله وغورځوي.
د اوکراين وزیراعظم ويلي، اوس هم اوکرايني پوځ ولاړ دی او تر اخري وخته پورې به جنګیږي.
د اوکراين د وزيراعظم نه پوښتنه شوې چې د روس صدر په دې باور دی چې ماسکو جګړه ګټي، شمېهل ويلي، چې په څو ښارونو کې جګړه روانه ده او يواځې په جنوب کې د خيرسن ښار د روس په کنټرول کې دی.
هغه ويلي، د اوکراين د 900 نه زيات ښارونه، کلي او علاقې د روس د يرغل نه ازادې دي، او اوکراين هيڅ اراده نه لري چې ختيځ کې تسليم شي.
د خالي/ شنبې په ورځ د اوکراين صدر زيلنسکي ویلي، که ماريوپول محاصره کيږي او پوځيان وژلی شي نو د خبرو عمل به ودرولی شي.
خو د روس صدر ولاديمير پيوټن د وړاندې نه ویلي خبرې اترې نزدې چې مړې دي.
او شمېهل د اتوار په ورځ ويلي، که ممکنه وي اوکراين سفارتي حل غواړي، هغه زیاته کړې خپل ملک، خپلې کورنۍ او خپله خاوره نه پرېږدي.
