د امریکې د صدر جوبايډن مېرمن جِل بايډن (لومړۍ مېرمن) د اوکراين سفر کړی، د اوکراين د صدر د مېرمن اولينا زيلنسکا سره يې په يو سکول کې لیدلي دي. کوم سکول چې د روس د بمبارۍ څخه بې کوره شوو دپاره پناه ګاه جوړ کړی شوی دی.
اغلې له دغې وروسته د اوکراين د جنګ څخه سلوواکيه ته د کډو شوو کېمپ ته هم ورغلې ده.
د اوکراين د صدر 44 کلنه مېرمن او دوه ماشومان بچي يې د روس په اوکراين د يرغل د لسو اوونيو مودې راهسې پټه وه.
د امریکا د صدر مېرمن د مياندو په نړيواله ورځ د اوکراين سفر کړی دی.
هغې ویلي، "ما غوښتل چې د مياندو په ورځ دلته راشم، مونږ مهم ګڼو چې د اوکراين د خلکو سره څرګندونه وکړو چې دا جګره دې ودرول شي، دا وحشي جګړه ده. او د امریکا وګړي د اوکراين د خلکو سره ولاړ دي".
د اوکراين د صدر مېرمن ویلي، "دوی دغه خبره محسوسوي. هغې د امریکايي لومړۍ مېرمن مننه کړې چې دغه زړور ګام يې اخستی دی. په داسې حال کې چې هلته جګړه روانه ده. او هغې دغه ګام بیا ستايلي چې د مياندو په نړيواله ورځ سره مينه او ملاتړ څرګند کړی شوی دی".
ويل شوي د امنيت له امله د لومړۍ مېرمن دغه سفر نه وو اعلان کړی شوی. خو د امریکايي لومړۍ مېرمن دغه سفر غېر معمولي دی خو بې ساری نه دی.
له دې وړاندې په کال 2005 او 2008 کې لارا بش د افغانستان سفرونه کړي وو، مشل اوباما په 2015 کې په قطر کې العدېد د هوايي اډې سفر کړی وو.
په عېن حال کې امريکايي سفارتکار د اتوار په ورځ په کيف کې خپلې سفارتخانې ته بيرته ورغلي دي.
د امریکې ناظم الامور کیف ته په واپسۍ تلو په ټويټر ويلي، "اوس اوس کيف ته راورسېدم، د يورپ په ورځ کيف ته په واپسۍ خوشاله یم، مونږ د اوکراين د خلکو سره ولاړ يو".
د راپورونو ترمخه د کېنېډا وزیراعظم جسټن ټروډو هم د اوکراين غېر اعلاني سفر کړی دی، او د صدر ولاديمیر زيلنسکي سره یې ليدلي دي.
ويل شوي ټروډو د کېنېډا سفارتخانه هم بيرته پرانستې، او هغو علاقو ته ورغلی چرته چې د روس د جګړې په لومړو کې ودانۍ تباه شوې وې.
