لاس رسیدونکی لینک

Breaking News

څېړونکي: د داعش خراسان مجله ښکاره کوي چې د امریکې، سعودي، پاکستان او افغان طالبانو ضد فعالیتونه تېزوي


واشنګټن ـــــ څېړونکي او خبريالان وايي د داعش خراسان ډلې له خوا په چاپ شوې مجله يا رساله کې د امريکې د ولسمشر ترڅنګ د سعودي عرب، پاکستان او د طالبانو د یو مشر ملا عبدلاغني برادار عکسونه ورکول دا خبره ښکاره کوي چې دوی د دغو کسانو او هېوادونو پرضد په خپلو فعاليتونو کې تېزوالی راوستل غواړي.

دوی وايي د دې خبرې پته به وروسته ولګېږي چې ايا داعش خراسان ډله د تحريک انصاف ګوند د مشر عمران خان او افغان طالبانو د مرستيال وزيراعظم ملا عبدلالغني برادار د پاره په راروان وخت کې څومره مشکل جوړولای شي.

د پېښور پوهنتون د نړيوالو اړيکو د څانګې استاد ډاکټر خورشيد خان وي او اې ډيوه ته وايي دا ډېره عجيبه خبره ده چې د داعش په اړه په وروستيو کې پاکستان ويلي وو،‌ دوی ته د القاعدې او تحريک طالبانو ډلې نه دومره ګواښونه نشته څومره چې داعش ډلې نه دي نو ځکه هغوی د پاکستان او د هغه د پوځ په ضد جګړه کول غواړي:

"دا ځلکه چې داعش هند او خراسان کومه صوبه ګڼي نو په هغې کې پاکستان هم د هغوی په نخښه دی ولې چې هغوی ګڼي پاکستان د امريکې سره په تېر ۲۰ کاله کې په جګړه کې اوږه په اوږه ودرېدلی دی".

ډاکټر خورشید وایي داعش په افغانستان کې د بقا په حالت کې ده او دا پېغام ورکول غواړي چې ګني دوی د ټولو طالبانو نه بلکې د ځينو کسانو خلاف دي چې هغوی د ايي ايس ايي او سي ايي اې سره نزدې کار کړی او هغوی د مسلمانانو په اړه د جوړجاري کيسې کړي نو ځکه دوی د مولا عبدالغني برادر نوم مخې ته راوړی دی.

د داعش خراسان ډلې د منهاج المبين په نوم يوه نوې چاپ شوې رسالې يا مجلې سرخط دی د اسلام او مسلمانانو پر ضد د کفارو سره د مرسته کوونکو د حکم په اړه روښانه تګلاره.

د دغې چاپ شوې مجلې په وړومبۍ پاڼه کې د څلورو کسانو عکسونه دي چې پکې د امريکې ولسمشر جوبايډن، د تحريک انصاف ګوند مشر عمران خان، د افغانستان مرستيال وزيراعظم ملاعبدالغني برادار او د سعودي بادشاه شامل دی.

څېړونکي وايي د عمران خان عکس په دغه مجله کې ځکه ورکړل شوی چې د عمران خان په خپل تېر حکومت کې د نړۍ نه د افغان طالبانو په رسميت پېژندلو او مرستې کولو په اړه ډېر مهم چلولی وو.

څېړونکی او خبريال حقنواز وي او اې ډيوه ته وايي د تحريک انصاف ګوند له خوا په خېبرپښتونخوا او قبايلي سيمه کې د داعش ډلې پرضد ډېر عمليات شوي دي او بله دا چې افغان طالبانو د داعش سره په جنګ دي:

"دا ټولې خبرې داسې دي چې څوک چې د افغان طالبانو مرسته کوي نو داعش هم هغوی ته هم هغه نظر کوي او د داعش چې کومې خبرې مونږ اوريدلې دي نو هغوی طالبانو ته هم مشرکين، کفار او د اسلام دايرې نه خارج ګڼي او دا ښکاره خبره ده چې هغوی (داعش) هر څوک په دغه تله کې حسابوي".

په وروستيو کې د امريکې او نورو نړيوالو هېوادونو د استخباراتي ادارو له خوا په راپورونو کې ويلي شوي وو په افغانستان کې د افغان طالبانو د واکمن کېدو نه پس دغلته د داعش خراسان ډلې د غړو شمېره ۴۰۰۰ نه هم زياته شوې ده.

څېړونکي وايي د افغان طالبانو له خوا د قيديانو خوشي کولو په نتيجه کې څه ۲۱۰۰ پورې تربيه شوي د داعش خراسان ډلې غړې خوشي شوي وو او پس د هغې دغې ډلې په افغانستان او پاکستان کې فعاليتونه زيات کړي دي.

  • 16x9 Image

    فرید شینواری

    فرید شینواری د پښتونخوا د خیبر ضلعې اوسېدونکی او په پېښور کې د وي او اې ډیوه د خبریال په توګه کار کوي، چې د سیمې پر ټولنیزو، سیاسي او نورو موضوعاتو رپوټونه جوړوي. هغه له 2012م کال راهیسې له فرنټېر پوسټ انګرېزي ورځپاڼې سره کار کوي او له دې سره سره یې له بېلابېلو سیمه ییزو رېډيوګانو سره هم کار کړی دی.

XS
SM
MD
LG