لاس رسیدونکی لینک

تازه خبر

پاکستان

 لانګ مارچ، انتخابات، او د پوځ نوی مشر به کله ټاکل کېږي؟

د پاکستان حکومت وايي د عمران خان د وخت نه مخکې د ټاکنو غوښتنه نه مني او پخوانی وزیر اعظم نواز شریف هم وايي لانګ مارچ د انقلاب لپاره نا، د خوښې پوځي مشر ټاکلو لپاره جوړ شوی دی.

په پاکستان کې څېړونکي او ځېني یوټیوبرز دا خبره اوس نوره هم په ډاډه زړه کوي چې عمران خان د پوځ د راتلونکي پوځي مشر د ټاکلو لپاره سیاسي فشار اچولی دی. که هر څه سم روان پاتې شو نو اوسنی پوځي مشر به د نومبر په ۲۹مه څوکۍ پرېږدي او د هغې وړاندې به اوسنی وزیر اعظم شهباز شریف نوی پوځي مشر ټاکي.

اوسنۍ سیاسي لانجې ختمولو لپاره د پاکستان د انګرېزي ژبې ورځپاڼې ډان هم په یوه اداریه یا مقاله کې ویلي پکار ده چې وزیر اعظم زر تر زره د لیاقت په حساب نوی پوځي مشر وټاکي. اداریه وايي نوی پوځي مشر د هېواد د دفاع لپاره، نه چې، د سیاستمدارانو د خواهشونو لپاره وټاکل شي.

د نوي پوځي مشر ټاکلو لپاره سیاسي فشار

عمران خان داسې نه وايي چې لانګ مارچ یې ځکه پېل کړی چې اوسنی وزیر اعظم د پوځ نوی مشر ونه ټاکي خو په هغه دا تور دی چې غواړي د اړي ګړي د لارې د پوځ د نوي مشر د ټاکلو عمل اغېز من کړي. عمران خان د وي او اې اردو سره تازه مرکه کې ویلي لانګ مارچ یې د حکومت نه د انتخاباتو لپاره د نیټې اخستلو لپاره پېل کړی دی.

د نواز شریف پرته، اوسني وزیر اعظم شهباز شریف هم ویلي چې عمران خان ورته د نوي پوځي مشر ټاکلو لپاره د خبرو وړاندیز کړی وو خو وايي هغه دغه وړانديز رد کړی وو. عمران خان د وزیر اعظم دغه بیان دروغ بللی وو.

اوسني حکومت ته نزدې ځېني خبریالان لکه نجم سېټهي هم دا خبره کوي چې عمران خان د پوځ د نوي مشر د ټاکلو لپاره فشار اچوي. نوموړي ځايي ټېلوېزیون ته ویلي حکومت دغه فشار نه مني او د نوي پوځي مشر ټاکل خپل قانوني حق بلي.

عمران خان د دې وړاندې په خپلو ویناو کې د پوځ د نوي مشر په اړه اندېښنې ښودي او دا یې هم ویلي چې ولې به، د هغه په وینا، په بډو تورن وزیر اعظم، د پوځ مشر ټاکي.

د پوځ د نوي مشر په اړه د عمران خان د سوچ په هکله د پوځ د استخباراتي ادارې ايي اېی ايي مشر جنرل ندیم انجم هم تېره اونې خپل لومړي مطبوعاتي کانفرنس ته ویلي وو چې عمران خان د وزیر اعظم په حېث د مارچ میاشت کې اوسني پوځي مشر جنرل قمر جاوېد باجوه ته د تاحیات پوځي مشر جوړولو وړاندیز کړی وو. دا هغه ورځې وې چې عمران خان په پارلېمان کې د بې باورۍ د تحریک سره مخ وو.

عمران خان د استخباراتو د مشر جنرل انجم د دغه وینا په اړه ویلي چې جنرل باجوه ته یې ویلي وو چې که خبره جنرل بلجوه ته د پوځ د مشرۍ په څوکۍ باندې د ناستې وي نو دا کار هغه هم کولی شي او د هغه د نوکرې موده غزولی شي.

د لانګ مارچ پينځمه ورځ او سیاسي بیانونه

د تحریک انصاف احتجاجي مارچ په پنڅمه ورځ د پنجاب ګجرانواله ښار څخه د اسلام اباد لورې ته دوام لري خو د اطلاعاتو مرکزي وزیره مریم اورنګزیب وایي د عمران خان د احتجاجې مارچ مقصد اړی ګړی جوړول دې او د سختو خبرو یا ګواښونو دلارې په حکومت دټولټاکنو غوښتنه نه شي منلی.

د تحریک انصاف مشر عمران خان په خپلو وینا ګانو کې یوازینۍ غوښتنه دشفافو ټاکنو کوي. هغه د پوځ یا اسټیبلشمنټ نه په دې اړه مرستې هم غواړي او وايي پوځ په اوسنۍ سیاسي لانجه کې بې طرفه پاتې کېدای نه شي. خو پوځ وایي سیاست کې مداخله نه کوي.

د څیړونکو وینا ده چې دعمران خان لخوا د واک ترلاسه کولو د پاره سخته رویه خپلول یا دړکې کول حالات د بې ثباتۍ لوري ته بوتللی شي.

پېښور کې میشت خبریال محمود جان بابر وي او ای ډیوه سره خبرو کې وایي،عمران خان که ټاکنې غواړي او که نه خو دوي خپل هغه واک بیرته ترلاسه کول غواړي چې ځېنې اخستل شوی و او په دې اړه دوي د اسټیبلشمنټ رول غواړي چې هغه هم هغه رنګه لاره صفا کړي څنګه چې کال ۲۰۱۸ کې شوي وو.

رسنیو سره خبرو کې میرمن اورنګزیب ویلي "دوي غواړې چې په هیواد کې ایمرجنسې ولګول شي خو د بدو خبرو، ټوپکو، خونړې پیښو یا دغه رنګه وینا ګانو کولو څخه ټاکنې نه شې ترلاسه کیدای."

وفاقې وزیرې شیرې رحمان هم د عمران خان د ایمرجنسې لګولو د بیان غندنه کړې او خپل ټویټ کې یې ویلې داسې ښکارې چې عمران خان مارشل لا غواړي خو د دوي تر مخه یو جمهوریت خوښوونکی سیاست مدار د مارشل لا لګولو خبره نه شي کولی.

عمران خان تیره ورځ یو ټویټ کې ویلي وؤ چې په هیواد کې د بیلټ ( ټاکنو) یا د ډزو د لارې انقلاب راتلی شي.

په ګجرانواله کې د پلویانو سره وینا کې عمران خان د عدلېې څخه هم د دوی د لانګ مارچ د ملاتړ غوښتنه وکړه.

هغه وویل "دا د ازادۍ لانګ مارچ دی- چیف جسټس صیب مونږ ستاسو او عدلیې اړخ ته ګورو چې په هیواد کې د ایین بالادستې ساتل دي."

عمران خان په تیرو ورځو کې دا هم ویلي وؤ چې د حکومت سره خبرې نه کوي خو دا خبره یې منلې وه چې د اسټیلشمنټ سره خبرې دوام لري.

د تحریک انصاف مشر اسد عمر په پنډې کې د خبریالانو سره خبرو کې ویلې، پر دې حقیقت سترګې نه شي پټیدلی چې د پاکستان په سیاست کې په لویو پریکړو کې د پاکستان د پوځ او عدلیې رول پاتې شوی او دهیواد بحران څخه دویستلو یوازینۍ لاره ددغو ادارو رول دی چې باید وې لوبوي- او د نوو ټاکنو اعلان وکړي.

د عمران خان ګوند تحریک انصاف دا وخت تر ټولو مالداره صوبه پنجاب او پښتونخوا کې حکومت لري. د ګلګت بلتستان ځايي حکومت هم د عمران خان د ګوند دی. د پاکستان صدر هم د عمران خان د ګوند دی او که قامي اسمبلۍ کې کېناست نو د اپوزېشن مشر به هم عمران خان جوړېږي. د دې تر څنګ په سېنټ کې هم نزدې نیماي غړي د تحریک انصاف دي خو یوازې عمران خان د واک نه لری کړای شوی دی.

See all News Updates of the Day

عطا تارړ: حکومت په تحریک انصاف د بنديز او په عمران خان د غدارۍ مقدمه د چلولو فېصله کړې

د اطلاعاتو د وزیر عطا تارړ خبري غونډې ته په غبرګون کې د پاکستان تحريک انصاف ګوند يو مشر شبلي فراز وويل، "د تحریک انصاف ګوند د مخې نيولو نورې طریقې په کار رانغلې اوس په تحریک انصاف بنديز لګوي دا کوشش دې هم وکړل شي".
د اطلاعاتو د وزیر عطا تارړ خبري غونډې ته په غبرګون کې د پاکستان تحريک انصاف ګوند يو مشر شبلي فراز وويل، "د تحریک انصاف ګوند د مخې نيولو نورې طریقې په کار رانغلې اوس په تحریک انصاف بنديز لګوي دا کوشش دې هم وکړل شي".

د پاکستان د اطلاعاتو وزير عطا تارړ ویلي حکومت په تحريک انصاف ګوند د بنديز لګولو فيصله کړې او حکومت به د مخصوصو څوکيو د فيصلې په اړه د نظرثانۍ خواست کوي، د پخواني صدر عارف علوي، د پخواني وزيراعظم عمران خان او پخواني ډپټي سپيکر قاسم سوري پرضد به د آيين د شپږمې مادې لاندې د غدارۍ مقدمه کوي.

تحریک انصاف وايي حکومت سره د ګوند د مخې نورې لارې نه شوې پاتې او اوس په تحریک انصاف بنديز لګوي. تحریک انصاف خبرداری وکړو چې په ګوند د بندیز فېصله به په ملک کې نور اړی ګړی او سياسي بې ثباتي به جوړه کړي.

د اطلاعاتو وزیر عطا تارړ نن په 15مه جولايۍ اسلام اباد کې خبري غونډې ته وویل، "د دې ملک سره ډېرې لوبې وشوې، پاکستان او تحریک انصاف يو ځای نه شي چلېدی."

هغه وويل، "تازه چې د سپريم کورټ فيصله راغلې ده، په هغې کې تاثر دا دی چې تحریک انصاف ته د غوښتو بغېر ريليف يا ښېګړه ورسره شوې ده، په دې فيصله کې قانوني سقم ته په کتو، حکومتي ګوند او اتحاديانو یې د دغه فيصلې پرضد د نظر ثانۍ يا دغه فيصلې ته د بيا کتنې د خواست فيصله کړې ده".

په 12مه جولايۍ د پاکستان سپريم کورټ د قامي او صوبايي اسمبليانو د مخصوصو څوکيو په اړه د پېښور هايکورټ او الېکشن کمېشن فېصلې کالعدم کړې او فېصله یې اورولې وه چې پاکستان تحریک انصاف (پي ټي آی) د مخصوصه څوکيو حقداره ګوند دی.

د چيف جسټس قاضي فايز عيسا په مشرۍ د سپريم کورټ 13 کسيزه فل کورټ بنچ د سني اتحاد کونسل په خواست فېصله اورولې او ويلي یې وو، د انتخابي نخښې په ختمولو سره په انتخاباتو کې د کوم سياسي ګوند د برخې اخستو حق نه شي ختمېدی، پي ټي آی دې په 15 ورځو کې د مخصوصو څوکيو په اړه خپل فهرست جمع کړي. په 13 ججانو کې اتوو د فېصلې حمايت او پينځو یې اختلاف کړی وو.

عطا تارړ وويل، "حکومت اراده لري چې کوم سياسي ګوند (پاکستان تحریک انصاف) بهرني فنډونه اخستي او الېکشن کمېشن په هغې فيصله کړې چې د ممنوعه سرچينو څخه یې ممنوعه فنډونه اخستي دي".

هغه زياته کړه، "د ممنوعه فنډونو فيصله راغلې او بيا شپږ کاله دغه فيصله سټی کړل شوې يا ودرول شوې وه، او په نهمه مې چې کوم معاملات شوي او په ملکي دفاع حمله شوې، د ايين سرغړونه شوې او دفاعي ادارو ته تاوان اړول شوی".

د اطلاعاتو وزیر د پاکستان تحریک انصاف ګوند د نوم اخستلو بغېر وويل، "بهرنی فنډنګ درسره دی، يهودي لابي مو ملاتړ کوي، ترهګرو ته پناه ورکوئ، او پوځ حمله کوئ".

د نوموړي په خبره، "بيا د سايفر لوبه جوړه کړل شوه، هغه تکړه قضيه ده، بیا په فنډنګ کولو د پاکستان خلاف قرارداد وړاندې کړل شو".

هغه وويل، "حکومت فيصله کړې ده دې ټولو ثبوتونو ته په کتو، مرکزي حکومت به په پي ټي آی د بنديز قضيه وړاندې کوي، په تحریک انصاف پابندي لګوو، د پاکستان د آيين 17 ماده مرکزي حکومت ته په سياسي ګوند د بنديز په حواله اختیار ورکوي او دغه معامله به سپريم کورټ ته لېږلی شي".

د اطلاعاتو وزير په خبري غونډه کې وويل، "د آيين سرغړونه شوې او اسمبلي ماته کړل شوې وه د عدم اعتماد په وخت، قاسم سوري د مرستيال سپيکر په څوکۍ ناست وو او اسمبلي یې ماته کړې وه".

عطا تارړ وويل، "حکومت فيصله کړې، چې د هغه وخت د صدر عارف علوي، د هغه وخت د وزيراعظم عمران نیازي او د هغه وخت د مرستيال سپيکر قاسم سوري پرضد رېفرنس ولېږل شي، او دا ارټيکل شپږ رېفرنس به د کابينې د منظورۍ وروسته سپريم کورټ ته لېږلی شي".

د اطلاعاتو د وزیر عطا تارړ خبري غونډې ته په غبرګون کې د پاکستان تحريک انصاف ګوند يو مشر شبلي فراز وويل، "د تحریک انصاف ګوند د مخې نيولو نورې طریقې په کار رانغلې اوس په تحریک انصاف بنديز لګوي دا کوشش دې هم وکړل شي".

تحریک انصاف ګوند په اېکس خپره کړې ويډيو کې شبلي فراز زياته کړې، "پاکستان مسلم ليګ او پاکستان پيپلز ګوند چې ځان ته جمهوري حکومتونه وايي، دوی دومره غټې فيصلې نه شي کولی، پکار وه چې د ملک غټو مسلو ته توجه ورکړل شوی وې خو د دوی توجه تحريک انصاف او عمران خان ته ده".

هغه وویل، "دا وروستی ګوزار دی په تحریک انصاف بندیز ولګوي".

بنو کې په پوځي چاوڼۍ چاودنه او بريد شوی

Paدبنو ضلعي روغتون چارواکو ويلي، روغتون ته اته کسان ژوبل ور وړل شوي چې زياتره یې ښځې او ماشومان دي او د روغتون د چارواکو په خبره دغه کسان د ديوال غورځېدو او شيشو ماتېدو له امله ژوبل شوي دي
Paدبنو ضلعي روغتون چارواکو ويلي، روغتون ته اته کسان ژوبل ور وړل شوي چې زياتره یې ښځې او ماشومان دي او د روغتون د چارواکو په خبره دغه کسان د ديوال غورځېدو او شيشو ماتېدو له امله ژوبل شوي دي

د خېبرپښتونخوا په جنوبي ضلعه بنو کې په پوځي چاودڼۍ د چاودنې او بريد خبر ورکړل شوی او ويل شوي په چاوڼۍ (کېنټ) کې دننه د غرمې پورې بريد روان وو. د بنو روغتون چارواکو د چاودنې له امله روغتون ته د وړل شوو اتوو ژوبلو کسانو تاييد کړی دی.

د پاکستان سرکاري رسنۍ (رېډيو پاکستان) ويلي، نن سهار د بنو په کېنټ ترهګر بريد شنډ کړل شوی دی. ويل شوي، ترهګرو کېنټ ته ننوتل غوښته او د بنو کېنټ او سپلايي ډيپو ترمنځ په سړک یې د بارودو ډک ګاډي ته چاودنه ورکړې ده.

ویل شوي، امنيتي ځواکونه د پاکۍ عمليات کوي. خو په خبر کې د اوښتي تاوان په اړه څه نه دي ويل شوي.

سرچيني وايي، بريد نن د 15مې جولایۍ په سهار وختي نزدې پينځه بجې شوی دی.

د سرچينو ترمخه په چاودنه او بريد کې څو عسکر هم ژوبل شوي، خو پوځ تراوسه پورې د بريد په اړه په رسمي ډول څه نه دي ویلي.

دبنو ضلعي روغتون چارواکو ويلي، روغتون ته اته کسان ژوبل ور وړل شوي چې زياتره یې ښځې او ماشومان دي او د روغتون د چارواکو په خبره دغه کسان د ديوال غورځېدو او شيشو ماتېدو له امله ژوبل شوي دي.

ويل شوي يو پوليس اهلکار هم ژوبل شوی دی.

ځايي خلکو وي او اې ډيوه ته ويلي، سهار وختي نزدې پينځه بجې يې يوه زوروره چاودنه اورېدلې او د هغې وروسته بيا ډزې پيل شوي او چاوڼۍ پله تلونکې لارې تړل شوي دي.

سرچينې وايي، په چاوڼۍ کې تر غرمې 12 بجو پورې د ډزو اوازونه اورېدل کېده.

د پاکستان پوځ او پوليسو تراوسه پورې د چاودنې يا بريد په اړه په رسمي ډول څه نه دي ويلي.

خو پوليس سرچينو چاودنه او بريد تاييد کړي دي.
د مطبوعاتي رپورټونو ترمخه د حافظ بهادر ډلې جېش الفرسان د بريد زمه واري منلې ده.


( د دې خبر نور معلومات را روان دي)

پاکستان کې د بجلۍ قيمتونه نور زیات کړل شوي دي

پاکستان کې د بجلۍ قيمتونه نور سېوا کړل شوي او د بجلۍ په کورنیو کاروونکو د يو يونټ په بنيادي ټېرف کې 7.12 روپۍ اضافه اعلان کړل شوې ده. مرکزي حکومت د بجلۍ نوو قيمتونو اعلاميه جاري کړې ده.

د پاور ډويژن لخوا جاري شوې اعلاميه کې ویل شوي، څوک چې د مياشتې د 200 يونټو نه کمه بجلي خرچ کوي، د ځايي مطبوعاتو ترمخه په هغو به نوې اضافه نه لګي.

خو ويل شوي، د نوې اضافې سره د بجلۍ د يو يونټ بنيادي ټېرف 48.38 روپو ته رسېدلی دی.

د اعلاميې ترمخه، د میاشتې په سر د 201 يونټو نه تر 300 يونټو پورې د يو يونټ په سر بنیادي ټېرف کې د 7.12 روپو اضافې سره يو يونټ 34.26 ته سېوا کړل شوی او د 301 نه تر 400 يونټو پورې ټېرف کې 7.02 روپۍ اضافه شوې او يو يونټ 39.15 روپو ته ګران کړل شوی دی.

دغه ډول د 401 نه تر 500 يونټو ټېرف کې 6.12 روپۍ اضافه شوې او د يو يونټ قيمت 41.36 روپو ته رسېدلی دی، د 501 نه تر 600 يونټو پورې بجلۍ خرچ کوونکو باندې هم د يو يونټ په سر بجلي 6.12 روپۍ ګرانه کړل شوې او يو يونټ یې 42.78 روپو ته رسېدلی دی.

د مياشتې د 601 نه تر 700 يونټو پورې بجلۍ خرچ کوونکو يو يونټ 43.92 روپو او د 700 يونټو نه زياتې بجلۍ خرچ کوونکو ټېرف هم 6.12 روپۍ ګران کړل شوی او يو يونټ 48.84 روپو ته رسېدلی دی.

ويل شوي، د ټېکسونو سره به د يو يونټ قيمت نور سېوا کيږي.

خو زياته کړل شوې، د میاشتې په سر د 50 يونټو پورې بجلۍ کاروونکو دپاره به يو بنيادي يونټ په 3.95 روپۍ او د 51 نه تر 100 يونټو پورې به يو يونټ په 7.74 روپۍ وي.

د رپورټونو ترمخه، د ټېکسونو لګېدو سره به دغه قيمتونه نور سېوا کيږي، او د 100 پورې يونټو خرچ کوونکو يو يونټ ټېرف به 37.38 روپو، د 200 يونټو پورې د يو يونټ قيمت به 45.15 روپو او د میاشتې په سر د 201 نه تر 300 يونټو پورې د يو يونټ قيمت 50.17 روپو ته ورسي.

اقتصاد پوهان وايي، په ملک کې د وړاندې نه ګراني زياته ده، د بجلۍ د قيمتونو سېوا کېدو سره به په عامو خلکو د ګرانۍ بوج نور زیات شي.

د حکومت مخالفه ګوندونو د بجلۍ قيمتونو سېوا کېدو ته سخت غبرګون ويلی او د بجلۍ په قيمتونو کې نوې اضافه یې رد کړې ده.

نوښار: خبریال حسن زېب په وسله وال بريد کې وژل شوی دی

د خېبرپښتونخوا په نوښار ضلع کې د نامعلومو وسله والو په ډزو یو خبریال حسن زېب وژل شوی دی، د خبریالانو تنظيمونو په پېښه کې د ککړو کسانو نيولو غوښتنه کړې ده.

د نوښار ضلعې د پوليسو په وينا، ياده پېښه پرون د 14مې جولايۍ په مازيګر خواوشا پينځه بجې شوې ده.

د پېښې مقدمه د وژل شوي جرنلسټ د ورور په مدعيت کې د نوښار په اکبرپوره پوليس سټېشن کې درج کړل شوې ده.

په مقدمه کې ویل شوي، دوی په ګاډي کې بازار ته ورغلي، هلته په موټر سايکل سواره دوه کسان راغلي، په حسن زېب یې ډزې کړي، ژوبل کړی یې دی او چې روغتون یې وړلو، ساه یې ورکړې ده.

د وژل شوي جرنلسټ حسن زېب ورور انور زېب ويلي، د چا سره یې دښمني يا بدي نشته.

پوليسو ویلي، د پېښې سي سي ټي وي فوټېج يا ويډيو یې ترلاسه کړې، چې پکې حمله کوونکي يا ډزې کوونکي ليدل کيږي.

پوليسو ویلي، د پېښې پلټنې پيل کړل شوي دي.

خېبرپښتونخوا کې خبريالانو ويلي، حسن زېب پېښور کې د ورځپاڼې (آج) خبريال وو، او د هغه د وژنې غندنه یې کړې ده.

د خېبرپښتونخوا مشير اطلاعات بېرسټر سېف د جرنلسټ په وژنه د افسوس څرګندونه کړې او ویلي يې دي، د پېښې چې څومره غندنه وشي کمه ده.

هغه ویلي، وزیراعلا علي امين ګنډاپور د پېښې نوټس اخستی، او پېښه کې ککړ کسان به زر تر زره ونيول شي او سزا به ورته ورکړل شي.

سېف ویلي، د بدقسمتۍ نه پاکستان کې پرله پسې په صحافيانو حملې روانې دي، صحافيانو ته ګواښونه کيږي، تشدد، اغوا او ګواښونه کېدل ورته معمول جوړ شوی دی.

پاکستان د جرنلسټانو دپاره خطرناکو هيوادونو کې شمارل کيږي.

د رپورټونو ترمخه پاکستان کې سږ کال د حسن زېب نه وړاندې پينځه جرنلسټان او مطبوعاتو کې کار کوونکي وژل شوي دي.

د جون په میاشت کې د خېبرپښتونخوا په خېبر ضلعه کې خبريال خليل جبران او له دغې وړاندې د مې په مياشت کې د سيند صوبې په ګوټکي ضلعه کې بل خبريال نصرالله ګډاني د نامعلومه وسله والو په ډزو وژل شوی وو.

پېښور هايکورټ: پاکستانۍ مېرمنې چې د افغانانو سره یې ودونه کړي غبرګ شهريت لرلی شي

پېښور هايکورټ حکم کړی، هغه پاکستانۍ مېرمنې چې د افغان وګړي سره یې واده شوی، کولی شي چې غبرګ شهريت يا تابعيت لري، باوجود د دې چې د پي او آر يا افغان سيټزن کارډ دپاره یې خواست کړی وي.

پېښور هايکورټ په فيصله کې ويلي، د 21 کالو عمر پورې کسان چې د پاکستاني مور او پلار څخه زېږېدلي، کولی شي چې غبرګ شهريت ولري.

ياده فېصله پرون په 13مه جولايۍ د پېښور هايکورټ جسټس سيد ارشدعلي او جسټس وقار احمد اورولې ده.

د افغان مېرمنو يا نارينو او 21 نه کالو نه کم عمر هغو کسانو چې مور يا پلار یې پاکستانی يا د افغانستان وي، او هغوی پي او آر يا افغان سيټيزن کارډونه اخستي، د دغو کسانو دپاره پېښور هايکورټ ته خواست شوی وو.

د خواست کوونکو وکیل (قانون پوه) سېف الله محب کاکاخېل وي او اې ډیوه ته وويل، تېر کال چې پاکستان د افغان کډوالو د بيرته ايستلو فيصله وکړه، دوی نزدې د 100 پورې کسانو دپاره پېښور هايکورټ ته خواستونه کړي او عدالت یې بيا په يو ځای اورېدنه کوله.

هغه وویل، دوی د هغه چا دپاره خواست کړی وو چې د چا مور پلار پاکستاني وو، او هغو مهاجر کارډونه اخستي وو، يا یې مور د پاکستان او پلار یې افغان وو، دغه ډول مختلف کېسونه وو او په هغې کې یې عدالت ته خواستونه کړی وو.

د کاکاخېل په خبره، پېښور هايکورټ پرون فيصله واوروله چې يوه پاکستانۍ ښځه ده او افغان يا افغانستان کې یې واده کړی دی نو هغه د دواړو هيوادونو تابعيت ساتلی شي، بيا چې کوم د 21 کالو پورې ماشومان دي هغوی هم د دواړو هيوادونو شهريت ساتلی شي.

هغه زیاته کړه، که د 21 کالو نه د چا عمر زیات وي هغه به څه کوي چې مهاجر کارډ (پي او آر يا اې سي سي) یې اخستی وي، نو د هغوی فيصله به وزارت داخله کوي.

هغه وويل، که پاکستانۍ ښځه وي د افغان سره یې واده کړی وي، هغه کولی شي چې د دواړو هيوادونو شهریت ولري، خو که افغانۍ ښځه وي او پاکستاني سره یې واده کړی وي نو د پاکستان قانون دی چې هغه به يو شهريت پرېږدي.

نوموړي کاکاخېل وويل، د پېښور هايکورټ دغه فيصله هم د دغو کسانو دپاره ده د چا دپاره چې دوی خواست کړی وو، او که بل چا ته دغه ډول مسله پېښيږي نو هغوی ځانله خواست کولی شي.

نور کتل

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:58 0:00

بي بي شیرینه

بي بي شیرینه: په ټیلیویژن
please wait

No media source currently available

0:00 1:59:58 0:00
XS
SM
MD
LG