لاس رسیدونکی لینک

تازه خبر

د ريکوډک منصوبې د ټيکسونو قانوني اختيار بيرته بلوچستان ته ورکول کيږي


د حکومتي واکمنه ګوند مسلم ليګ ن مشرتابه په ځانګړې توګه وزيراعظم شهباز شريف، د جمعيت علما اسلام ف او بي اين پي مينګل له مشرتابه سره تماس نيولی او باور يې ورکړی چې د دوی غوښتنې به ومنل شي او د رېکوډک اړوند مسله به حل شي.

باوري سرچيني وي او اې ډيوه ته ويلي چې د راروانې دوشنبې په ورځ به يو ځل بيا د پاکستان د پارليمان لخوا له ترميم سره نوی قانون منظور شي، او له بلوچستان څخه د ريکوډک اخسيتل شوي اختيارات به بيرته بلوچستان ته وسپارل شي.

د دسمبر په دويمه اوو نۍ کې د بلوچستان صوبې، سيند صوبې او له دغې وروسته د پاکستان پارلمينټ او سېنټ د بلوچستان د چاغي په سيمه کې سرو زرو او کاپر د کان ( ريکوډک ) اړوند قوانين جوړ کړي وو او له هم دې سره سم د رېکوډک د ټېکسونو روپۍ د بلوچستان په ځای مرکزي حکومت ته د تر لاسه کولو قانوني حق ورکړل شوی وو.

تر دې قانون لاندې مرکزي حکومت ته دا اختيار هم ورکول شوی چې د رېکوډک په اړه ټيکسونه زيات يا کم کړي خو په دې کې به د بلوچستان حکومت پوښتل ضروري نه وي.

کله چې دا قانون منظور کړل شو نو د بلوچستان قام پاله او نورو سياسي ګوندونو او مدني فعالانو دا قانون د جمهوريت او صوبو ته ورکول شوي اتلسم ترميم ضد عمل وباله.

بي اين پي منګل، نېشنل پارټۍ، جميعت علما اسلام ف او عوامي نيشنل ګوند د رېکوډېک په اړه مرکز ته د واک ورکولو قانون په رسميت پېژندلو نه انکار کړی دی.

د مسلم ليګ ن سره په اوسني مرکزي حکومت کې شامل بلوڅ قامپاله سياسي ګوند بي اين پي مينګل تر څنګ جمعيت علما اسلام، نېشنل ګوند، او نورو ګوندونو د بلوچستان په صوبايي او مرکزي حکومت دا تور پورې کړی چې د رېکوډک اړوند قانون يې د يادو ګوندونو له پوښتنې او مشورې پرته په پټه او په تادۍ کې پارليمان ته رواړی او منظور کړی، ځکه يادو ګوندونو د دې قانون د نه منلو اعلان کړی دی.

دوي ويلي که حکومت يې غوښتنې و نه مني نو، نه دا چې سخت دريځ به خپل کړي بلکې د مسلم ليګ څخه د لارې جلا کولو او له مرکزي حکومت څخه د وتلو لاره خپلولو خبره يې هم کړې ده.

سرچينې ډيوه ته وويل چې د احتجاج وروسته وزير اعظم شهباز شريف او نورو لوړ پوړو حکومتي چارواکو د يادو احتجاجي ګوندونو و مشرانو ته ويلي چې دوی دغه قانون د ټيتيان کاپر او بېرګ ګولډ کمپنۍ سره د نوي تړون د پخلي او و کمپنۍ ته د باور ورکولو په خاطر منظور کړی او لدې پرته يې بله کومه شومه/اراده نه وه.

وايي ځکه يې د يادو ګوندونو و مشرانو ته باور ورکړی او ويلي يې چې د پاکستان په اساسي قانون کې چې په اتلسم ترميم کې و صوبو ته کوم اختيارات ورکول شوي هم هغه اختيار به په پوره توګه بېرته د نوي قانون له منظوره کولو سره سم و بلوچستان ته ورکړل شي.

سرچيني وويل چې په پارليمنټ کې چې بېرته ترميمي بل منظور کړل شي نو له دې سره به د رېکوډک منصوبې د ټېکسونو اړوند ټول قانوني اختيار به بېرته بلوچستان ته حاصل شي.

د بلوچستان قامپاله او سياسي ګوندونو د صوبايي او مرکزي حکومت له لوري د ريکوډک په اړه جوړ شوی قانون له اوله رد کړی او دا يې د بلوچستان پر حق ډاکه بللې ده.

د بلوڅ قامپاله ګوند بي اين پي مشر سردار اختر مېنګل پر خپل ټويټر پاڼه ليکلي چې د ریکوډک اختيار و وفاقي حکومت ته وکول کله هم نه تسليموي.

د بلوچستان د پخواني وزير اعلا ډاکټر عبدالمالګ بلوڅ ګوند نېشنل پارټۍ هم د دې قانون د نه منلو اعلان کړی، د نېشنل ګوند اوسني سنېټر میر طاهر بزنجو ویلي په جمهوري حکومت کې چې د ریکوډک په اړه کوم بل منظور کړی شوی دا نه يواځي له سیاسي او جمهوري روایاتو سره زیاتی دی بلکې د پاکستان ايين تر پښو د لاندې کولو په معنا دی.

د مولانا فضل الرحمان ګوند جمعيت علمااسلام هم د دې مخالفت کړی، د د بلوچستان صوبايي مرستيال وياند او پخواني صوبايي وزير عين الله شمس و ډيوه ته وويل،

" اول خو دا معلومول ضروري وو چې دا قانوني مسوده د چا په غوښتنه اول د سيند او بيا د بلوچستان له ايالتي اسمبلۍ څخه پاس کړل شو، دا يې ځکه داسې وکړه چې له هم دې لارې مرکز ته قانوني حق ترلاسه شو او بيا يې د رېکوډک قرارداد منظور کړ".

د هغه په خبره " دا کېس په انټرنېشنل کورټ اف لاء کې وچلېدی چېري چې موږ دا کېس وګټی خو بيا د يوه سازش تحت و ثالثي عدالت ته وړل شوی وو، موږ ته دا قانون د منلو نه دی".

د بلوچستان حکومت له لوري د منظور کړل شوي قرارداد د تفصيل په اړه وتلي خبريال او شنونکي سيد علي شاه وایي، د بلوچستان حکومت چې کله د سرو زرو او کاپر د کان معاهده له ټهيتيان او بېرک ګولډ کپمنۍ سره وکړه نو له هغه ورورسته حکومت دا دعوه کوله چې اوس به و بلوچستان ته د لس فيصده پر ځای 25 فيصده برخه ورکول کېږي خو په خبره يې چې د دې قانون له منظوره کېدو ورستو د بلوچستان دغه برخه بېرته کمېږي ولې چې نور بلوچستان دا اختيار له لاسه ورکړی،

"پنځه بيلابېل ټکسونه وه کوم چې بېرک ګولډ کمپنۍ د بلوچستان و حکومت ته ورکول خو کوم قرارداد چې بلوچستان اسمبلۍ پاس کړی د دې له کبله د دغه ټيکسونو اختيارات و وفاق ته وسپارل شوه".

  • 16x9 Image

    حفیظ الله ستوری شېرانی

    حفیظ الله ستوری شېرانی په بلوچستان کې د وي.او.اې ډیوه د خبریال په توګه کار کوي. هغه له بلوچستان پوهنتون څخه په جرنلزم او پښتو ادبیاتو کې ماسټرۍ کړې دي او له تېرو اوو کلونو راهیسې د جرنلزم په میدان کې کار کوي. شپږ کاله یې د پاکستان له (ډان) ټیلیویژن سره د خبریال په توګه کار کړی او په بېلابېلو ورځپاڼو کې یې کالمونه هم لیکلي دي. په بلوچستان کې د ډیوه رېډیو او ټیلویژن لپاره د ملټي مېډیا په برخه کې پر بېلابېلو سیاسي، کلتوري او ټولنیزو موضوعاتو رپوټونه جوړوي.

     

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:56 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG