د پاکستان د قامي اسمبلۍ د سېنېټ د خزانې قايمه کمېټۍ پنجاب او خېبرپښتونخوا صوبو کې د انتخاباتو دپاره الېکشن کمېشن ته د فنډو ورکولو قانوني مسوده رد کړې ده.
د ځايي ميډیا ترمخه د قايمه کمېټۍ غونډه د قېصر احمد شېخ په مشرۍ کې شوې او د خزانې په مني بل يا قانوني مسوده کې پرې خبرې شوي او بیا په اتفاق سره دغه رد کړی شوې ده.
د خزانې وزیر مملکت عايشه غوث پاشا ویلي، د ملک اقتصادي حالت او بجټ سخت د فشار لاندې دی حکومت د سختو مالي مشکلاتو سره مخ دی، او تاوان ورته په ميراث کې پاتې شوی دی.
هغې ويلي د نړيوالې مالياتي ادارې [ايي اېم اېف] پروګرام بحاليږي او اقتصادي جايزه روانه ده.
د الېکشن کمېشن سيکرټري عمرحميد ویلي، سپريم کورټ ته د 21اربه روپو په فنډ جواب ورکول دي او د الېکشن دپاره په بجټ کې یواځې پينځه اربه روپۍ جاري شوي دي.
د کمېټۍ غړي برجيس طاهر ويلي الېکشن کمېشن ته په اوسنيو حالاتو کې پېسې نه شو ورکولی انتخابات دې په يو ځای وکړی شي.يواځې په پنجاب کې انتخابات د ملک او اقتصاد دپاره خطره ده.
د پاکستان سپريم کورټ په څلورم اپرېل په پنجاب او خېبرپښتونخوا صوبو کې د انتخاباتو په اړوند د قضیې فېصله اورولې او حکم یې کړی وو چې په 14مه مې دې په پنجاب صوبه کې انتخابات وکړی شي.
عدالت ويلي وو د خېبرپښتونخوا اسمبلۍ د انتخاباتو معامله به ځانله کتل کيږي.
په عدالتي فېصله کې ويل شوي وو چې مرکزي حکومت دې د لسم اپرېل پورې د انتخاباتو دپاره 21 اربه روپۍ جاري کړي او په 11م اپرېل دې الېکشن کمېشن د فنډ د صولې رپورټ سپريم کورټ ته وړاندې کړي، او د فنډ نه ورکولو په صورت کې به بيا عدالت مناسب حکم جاري کوي.
خو د پاکستان په قامي اسمبلۍ کې په وړاندې کړی شوي يو قرارداد کې د پاکستان د سپريم کورټ د درې کسيزه ججانو د بنچ فېصله رد کړی شوې او ويل شوي چې د ايين او قانون ترمخه پارلیمان د اکثریتي بنچ فېصله عملي ګرځوي او وزيراعظم دې په اوسنۍ فېصله عمل نه کوي.
او بيا د انتخاباتو دپاره د فنډنګ يا پېسو ورکولو خبره قايمه کمېټۍ ته لېږل شوې چې د دې دپاره به مني بل وړاندې کولی شي.
