لاس رسیدونکی لینک

تازه خبر

رپوټ: په ایران کې تېزندۍ زیاتې شوې دي،‌ یواځې تېر کال یې 582 بندیان په دار ځړولي دي


واشنګټن ــــ د بشري حقونو دوو ډلو په یو رپوټ کې ویلي چې ایران په تېر کال کې لږ تر لږه 582 بندیان په دار کړي دي، وایي دا له 2015م کال راهیسې د خلکو د تېزندۍ کولو تر ټولو لوړه کچه ده.

په ناروې کې د ایران د بشري حقونو ټولنې (ای ایچ آر) او په پېرس کې د مرګ د سزا خلاف کارکوونکي تنظیم (اي سي پي ایم) د پنجشنبې- زیارت په ورځ ویلي چې د وړم کال په نسبت په ایران کې تېر کال د تېزندۍ سزاګانې 75 فیصده زیاتې شوې دي.

د رپوټ له مخې په 2021م کال کې هم په ایران کې 333 کسان په دار ځړول شوي وو.

دغو تنظیمونو په خپل رپوټ کې ویلي چې د ایران حکومت د خپل واک د ټینګ ساتلو لپاره هڅه کوي چې د مرګ له سزا څخه د خلکو د ډارولو او ځورولو په توګه کار واخلي.

رپوټ وایي تر نیمایي زیات هغه کسان چې په تېر کال کې په دار کړل شوي دي په هغوی باندې د قتل تورونه لګېدلي وو.

د بشري حقونو دغه تنظیمونه وایي د تېر کال په ستمبر کې چې د پولیسو په بند کې د مهسا امیني تر مړینې وروسته احتجاجونه پیل شول، د هغه په نتیجه کې "څلور احتجاج کوونکي تېزندۍ کړل شوي دي".

وایي ویره لري چې 100 نور کسان هم د مرګ او نورو سزاګانو تر څنګه له خطر سره مخ دي چې کېدای شي هغوی هم په دار کړل شي.

د ایران د بشري حقونو د ټولنې مشر محمود امیري مقدم وایي له احتجاجونو سره اړوند نړیوال غبرګون د تېزندۍ مخه ونیوله، خو وایي ایران د عامو خلکو د ویرولو لپاره له نورو تورونو سره مخ کسانو په دار کول پیل کړل چې خلک له احتجاجونو را وګرځوي:

"مظاهره کوونکو ته د مرګ د سزا اورولو خلاف نړیوالو غبرګونونو د [ایران] د اسلامي جمهوریت لپاره دا ستونزمنه کړې ده چې تېزندۍ ته دوام ورکړي".

د ایران د بشري حقونو تنظیمونو اندېښنه ښکاره کړې چې په تهران او نورو ښارونو کې د احتجاجونو له پیلېدو وروسته د نشه یي موادو په تړاو تېزندۍ یا اعدامونه هم ډېر زیات شوي دي.

رپوټ وایي‌ د احتجاجونو تر شروع کېدو وروسته چې څومره کسان په دار ځړول شوي دي د هغوی نیمایي او په 2022م کال کې په ټولو 582 تېزندیو کې 44 فیصده هغه کسان دي چې د نشه یي موادو اړوند تورونه پرې لګېدلي وو.

دغه تنظیمونه وایي په 2021م کال کې چې څومره خلک د نشه یي موادو په مقدمو کې په دار شوي دا د هغه په نسبت دوه چنده ډېر دی او د 2020م په نسبت لس چلنده ډېر دی.

په رپوټ کې ویل شوي چې په ټول هیواد کې د ټولو تېزندیو 30 فیصده برخه خلک د سني مسلمان بلوڅ اقلیت غړي دي، وایي دوی یواځې د ایران د ابادۍ له دوو تر شپږو فیصده برخه جوړوي.

یادونه:- په دې رپوټ کې د وي او اې فارسي او اې ایف پي له رپوټونو معلومات اخیستل شوي دي.

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:57 0:00

بي بي شیرینه

بي بي شیرینه: په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG