واشنګټن – د اوکراین لومړي وزیر ډینیس شېمېهال د جمعې په ورځ خبریالانو ته وویل، چې په روانه اونۍ کې یې په واشنګټن کې د خپلو لیدنو په ترڅ کې له روس سره په جګړه کې د ملاتړ لپاره د پنځه بیلینه ډالرو نورې مرستې ژمنې ترلاسه کړې.
شېمېهال د نړیوالي مالي ادارې یا آی ایم اېف، نړیوال بانک او د اروپا د پانګونې د بانک له استازو او همدارنګه له امریکايي چارواکو سره لیدنې وکړې.
هغه وویل، اوکراین په دغو لیدنو کې له سوېټزلېنډ، ډنمارک او نورو هېوادونو څخه د نورو مرستو ژمنې ترلاسه کړې او همدارنګه د امریکا د الوتکو له جوړونکې کمپنۍ بوینګ سره یې یو تړون لاسلیک کړ چې د اوکراین له کمپنیو سره د ۲۰۰ بیلینه ډالرو په ارزښت رعایت وکړي.
هغه زیاته کړه، چې کیېف به د لندن په راتلونکي کانفرانس کې نوره مرسته هم ترلاسه کړي.
شېمېهال وویل، "نړیوالو شریکانو مونږ ته د دوامدارې مرستې ډاډ راکړی."
هغه زیاته کړه چې په راتلونکو څلورو کلونو کې له اوکراین سره ټولټال ۱۱۵ بیلینه ډالره مرسته وشي. د دې ترڅنګ آی ایم اېف هم تېره میاشت ته اوکراین ته د ۱۵.۶ بیلینه ډالرو پور منظوري ورکړې.
شېمېهال وویل، اوکراین سږ کال ۱۴ بیلینو ډالرو ته اړتیا لري چې د بودېجې کسر پرې ډک کړي چې د دې لپاره به امریکا د ۲.۳ بیلینه ډالرو مرسته او اروپا اتحاد د ۱.۱۰ بیلینه ډالرو مرسته وکړي.
د سوېتزلېنډ او ډنمارک ترڅنګ، هغه وویل، چې هسپانیې، ایرلېنډ، جاپان، لیتویا، لیتوانیا، ایسلېنډ او هالنډ هم د نورو مرستو ژمنې کړي.
د امریکا د خزانې وزیرې جنېت یلېن چې په یو حیران کونکي سفر کې یې په فیبرورۍ کې له کیېف څخه لیدنه کړې وه او د زیارت یا پنجشبې په ورځ یې یو ځل بیا له شېمېهال سره ولیدل یو ځل بیا د مالي له وزیرانو او مرکزی بانکونو څخه وغوښتل چې له اوکراین سره مرسته وکړي.
هغې د زیارت په ورځ وویل چې شېمېهال ته یې وویل، چې امریکا د ۲۰۲۲ کال د فیبرورۍ یعنې د جګړې د پیل راهیسې له اوکراین سره ډېره زیاته اقتصادي مرسته کړې او په راتلونکو میاشتو کې به د امنیتي او بشري مرستې ترڅنګ نوره مرسته هم ورسره وکړي.
شېمېهال همدارنګه وویل، چې اوکرایني چارواکو د امریکا د کابینې له ګڼو نورو وزیرانو سره هم ولیدل چې په هغو کې د دفاع وزیر لویډ اسټن، د سواګرۍ وزېرې ګینا رېمونډو هم شامل وو چې زیات پام پکې د اوکراین بیارغونې ته شوی وو چې څنګه بهرنۍ پانګې ورته راجذب کړي.
